Лукашэнка і Пуцін падпісалі дамову аб фарміраванні аб'яднанага рынку электраэнергіі СД

Адпаведны дакумент падпісалі прэзідэнты Беларусі і Расіі Аляксандр Лукашэнка і Уладзімір Пуцін на пасяджэнні Вышэйшага дзяржсавета СД у Мінску, паведамляе БЕЛТА.

Як адзначаў напярэдадні пасяджэння ВДС дзяржаўны сакратар Саюзнай дзяржавы Дзмітрый Мезенцаў, такім чынам бакі завяршаюць працу па фарміраванні адзінага энергарынку Саюзнай дзяржавы. Паводле яго слоў, гэта "узаемавыгаднае пагадненне, якое дазваляе знізіць да мінімуму страты ў энергасетках, збалансаваць тарыфы, забяспечыць узаемны ператок энергіі дзеля людзей, дзеля папаўнення бюджэтаў". Гэта таксама і вынік ўводу ў строй Беларускай атамнай станцыі, фарміраванне той сістэмы адносін, якая грунтуецца на падмурку вялікага даверу, таварыства і сапраўды раўнапраўнага ўліку ўзаемных інтарэсаў, дадаў ён.

Міністр энергетыкі Аляксей Кушнарэнка растлумачыў журналістам, што аб'яднаны рынак электраэнергіі будзе фарміравацца паэтапна, з улікам паралельнай працы дзвюх энергасістэм з іх тэхналагічнымі, арганізацыйнымі асаблівасцямі. Функцыянаваць ён будзе на аснове правіл, што ўжо распрацаваны, праходзяць працэдуру ўзгаднення, якая, паводле слоў кіраўніка Мінэнерга, будзе завершана прыблізна ў першай палове 2025 года. "На дадзеным этапе мяркуецца, што ўсе ўзаемаадносіны будуць будавацца праз упаўнаважаных сеткавых аператараў. Яны будуць вызначаны і з беларускага, і з расійскага боку", - сказаў міністр.

Канчатковая мэта абедзвюх краін - аб'яднаць усе энергетычныя рынкі - як газавы, так і электраэнергіі, што было прапісана ў Дагаворы аб стварэнні СД яшчэ ў 1999 годзе.