Лукашэнка павіншаваў калектыў Гарадзейскага цукровага камбіната з 65-годдзем прадпрыемства

Прэзідэнт Беларусі Аляксандр Лукашэнка павіншаваў работнікаў і ветэранаў Гарадзейскага цукровага камбіната з 65-годдзем з дня ўтварэння прадпрыемства. Пра гэта паведамляе БЕЛТА са спасылкай на прэс-службу кіраўніка дзяржавы.

"Салодкая гісторыя прадпрыемства пачалася напярэдадні новага, 1961 года, калі была зварана першая партыя гарадзейскага цукру. Гэтыя два словы сталі адным з самых вядомых айчынных харчовых брэндаў, упадабаных у Беларусі і далёка за яе межамі", - гаворыцца ў віншаванні.

Аляксандр Лукашэнка адзначыў, што Гарадзейскі цукровы камбінат, які з’яўляецца горадаўтваральным прадпрыемствам, год за годам упэўнена набірае моц, адкрываючы прынцыпова новыя напрамкі: вытворчасць сокаў, джэмаў, канфіцюраў, агародніннай прадукцыі і фруктова-ягадных паўфабрыкатаў.

"Перакананы, што і надалей будзеце годна вырашаць маштабныя задачы, якія стаяць перад камбінатам, і ўносіць значны ўклад у гарантаванне харчовай бяспекі краіны", - падкрэсліў Прэзідэнт.

Кіраўнік дзяржавы пажадаў калектыву і ветэранам прадпрыемства моцнага здароўя, міру, дабра і новых дасягненняў на карысць роднай Беларусі.