Адміністрацыя ЗША плануе новыя кантакты з Расіяй па ўрэгуляванні канфлікту ва Украіне

Адміністрацыя ЗША плануе правесці некалькі новых кантактаў з Расіяй, каб абмеркаваць пытанне ўрэгулявання канфлікту ва Украіне. Пра гэта сказаў дзяржсакратар ЗША Марка Рубіа, паведамляе ТАСС.

"Дастаткова сказаць, што будзе мноства кантактаў з расіянамі", - сказаў Рубіа журналістам. Паводле яго слоў, Вашынгтон чакае адказу ад Масквы па пытанні перамір'я ва Украіне. Рубіа таксама лічыць, што за выкананнем магчымых дамоўленасцей аб спыненні агню ва Украіне можна будзе сачыць у тым ліку пры дапамозе спадарожнікаў.

Ён таксама паведаміў, што амерыканская дэлегацыя абмяркоўвала з прадстаўнікамі Украіны тэрытарыяльныя ўступкі падчас перамоў у Саудаўскай Аравіі, якія прайшлі 11 сакавіка.

Каменціруючы магчымы працэс урэгулявання канфлікту, Рубіа адзначыў ролю Еўропы ў ім. Паводле слоў дзяржсакратара, пытанні аб санкцыях Еўрасаюза супраць Расіі і замарожаных актывах РФ, імаверна, стануць часткай будучых мірных перамоў.