Са знакам якасці - на ВДНГ у Маскве адкрылася выстава беларускіх тавараў

Выстава беларускіх тавараў, удастоеных Дзяржаўнага знака якасці, адкрылася на ВДНГ у Маскве.

Экспануюцца лепшыя ўзоры прадукцыі, вырабленай у нашай краіне: прадукты харчавання, тэкстыль, машынабудаўнічая прадукцыя. Сярод удзельнікаў - вядомыя брэнды, якія даўно заваявалі прызнанне спажыўцоў не толькі ў Беларусі, але і за мяжой.

Аляксандр Рагожнік, Надзвычайны і Паўнамоцны Пасол Беларусі ў Расіі:

"Сёння на рынку РФ больш за 1 тыс. найменняў рознай прадукцыі, вырабленай у нашай краіне. І ўсе яны, вядома, адпавядаюць высокім крытэрыям якасці. Гэта, калі яго можна так назваць, конкурс, магчымасць рухацца ўсім астатнім да высокіх стандартаў".

Наведвальнікі выставы змогуць даведацца пра лепшыя беларускія брэнды, работу, якая праводзіцца ў краіне па павышэнні якасці выпуску прадукцыі і пазнаёміцца з гісторыяй развіцця нацыянальнай інфраструктуры якасці: ад знака якасці СССР да Дзяржаўнага знака якасці суверэннай Беларусі.