На разглядзе ў Палаце прадстаўнікоў знаходзяцца 23 законапраекты

Больш як 20 законапраектаў на сённяшні дзень знаходзяцца на разглядзе ў Палаце прадстаўнікоў Нацыянальнага сходу Беларусі. Каля траціны дэпутаты разгледзяць ужо на найбліжэйшай сесіі, якая пройдзе ў чацвер, 14 лістапада.

У цэлым, задачы па падрыхтоўцы праектаў законаў выкананыя, адзначыў спікер Палаты прадстаўнікоў Ігар Сергеенка. У прыватнасці, вялікая работа праведзена па змяненні кодэксаў па пытаннях крымінальнай адказнасці. Самыя вострыя абмеркавалі на дыялогавых пляцоўках. Яны прайшлі ва ўсіх рэгіёнах. Зараз дэпутаты яшчэ раз звераць пазіцыі, улічаць слушныя заўвагі і прапановы, каб выйсці на выніковы праект закона. Усе змяненні будуць вывераныя, падкрэсліў Сергеенка.

Узважаны падыход і да законапраекта аб рыелтарскай дзейнасці. Дакумент таксама ўнесены ў Палату прадстаўнікоў. У полі зроку дэпутатаў і іншыя актуальныя тэмы, якія патрабуюць карэкціровак. Напрыклад, развіццё лічбавага права.

Юрый Панфілаў, старшыня Пастаяннай камісіі Палаты прадстаўнікоў Нацыянальнага сходу Беларусі:

"Інфармацыйныя тэхналогіі, IT-сфера актыўна развіваюцца. Лічбавізацыя грамадства ўсебаковая, і, безумоўна, інфармацыйныя тэхналогіі патрабуюць заканадаўчага рэгулявання. Лічбавыя тэхналогіі дазваляюць нам паскорыць працэс зносін і атрымання адміністрацыйных працэдур, нейкіх паслуг. Але ў той жа час нясуць новыя выклікі, рызыкі. Таму на парламенцкіх слуханнях 22 лістапада ў Авальнай зале мы будзем разглядаць пытанні вузкіх месцаў у лічбавым праве".

Пытанне для краіны актуальнае, яно патрабуе сур'ёзнага прававога рэгулявання, падкрэслілі дэпутаты. Для абмеркавання магчымых заканадаўчых навацый на парламенцкія слуханні запрошаны прадстаўнікі больш як трох дзясяткаў дзяржорганаў і арганізацый.

Фота БЕЛТА