Лукашэнка хоча адкрыць новыя напрамкі супрацоўніцтва з Прымор'ем

Прэзідэнт Беларусі Аляксандр Лукашэнка 11 сакавіка на сустрэчы з губернатарам Прыморскага края Расіі Алегам Кажамякам абмеркаваў магчымыя новыя напрамкі супрацоўніцтва, піша БЕЛТА.

"Павінен адзначыць, Алег Мікалаевіч, што Вы - чалавек слова. Прыехалі ў Беларусь, прыехалі да Прэзідэнта - абмеркавалі пытанні. Можа, нешта новае прыдумаем з Вамі ў нашым супрацоўніцтве. Пракантралюем, як выконваюцца старыя дамоўленасці, дасягнутыя раней", - сказаў кіраўнік дзяржавы ў пачатку сустрэчы.

Аляксандр Лукашэнка адзначыў, што рады магчымасці сустрэцца асабіста з кіраўніком расійскага рэгіёна, якога шмат звязвае з нашай краінай: "Як я гавару, зямля далёкая, але наша. Уладзівасток і Прымор'е ніколі не былі для нас чужымі".