Прэзідэнт Беларусі азнаёміўся са станам спраў на агракамбінаце "Зара"

Прэзідэнт Беларусі Аляксандр Лукашэнка падчас рабочай паездкі ў Магілёўскую вобласць азнаёміўся са станам спраў на агракамбінаце "Зара", піша БЕЛТА.

Размова ў першую чаргу зайшла наконт фінансава-гаспадарчай дзейнасці агракамбіната. Камітэт дзяржкантролю перад прыездам кіраўніка дзяржавы выявіў некаторыя праблемныя пытанні ў захоўванні кармоў. На гэта Аляксандр Лукашэнка асобна звярнуў увагу гендырэктара агракамбіната Кацярыны Зароўскай.

У цэлым жа справы ў гаспадарцы ідуць нядрэнна. Прыбытак накіроўваецца на развіццё вытворчасці, абнаўленне тэхнікі. Сярэдняя рэнтабельнасць па гаспадарцы - 6,6 %, а ў перапрацоўцы - каля 12 %. Дастаткова паспяхова працуе "Зара" і па апрацоўцы розных культур, аб чым адбылася грунтоўная размова з кіраўніком дзяржавы.

Напрыклад, ураджайнасць на полі азімага ячменю, якое агледзеў Прэзідэнт, перавышае 60 ц/га. На гэтую сельгаскультуру кіраўнік дзяржавы апошнія некалькі гадоў звяртае асаблівую ўвагу шмат у чым па прычыне таго, што азімы ячмень убіраюць раней за іншыя збожжавыя культуры. Гэта дазваляе аператыўна атрымаць кармы для жывёлагадоўлі і больш раўнамерна задзейнічаць тэхніку перад масавай уборкай. Хоць культура і капрызная, але пры прытрымліванні тэхналогій можна разлічваць на добры вынік. І гэтая практыка сябе апраўдвае, аб чым сведчыць і вопыт агракамбіната "Зара".

У гаспадарцы таксама ёсць два буйныя малочна-таварныя комплексы, працуюць таксама ў сферы птушкагадоўлі, гадоўлі свіней, ёсць сетка сваіх гандлёвых аб'ектаў.