Вялікая камандзіроўка Прэзідэнта Беларусі ў Гомельскую вобласць стартавала

Стартавала вялікая камандзіроўка Прэзідэнта Беларусі Аляксандра Лукашэнкі ў Гомельскую вобласць. Галоўнай тэмай паездкі стала рэгіянальнае развіццё, паведамляе БЕЛТА.

Першым пунктам стаў Мазырскі раён. Кіраўнік дзяржавы азнаёміцца з работай ААТ "Мазыртэхсэрвіс", дзе аднаўляюць і вырабляюць сельгастэхніку. Прадпрыемства адносіцца да арганізацый аграсэрвісу, асноўнай функцыяй якіх з'яўляецца тэхнічнае абслугоўванне, рамонт машын і абсталявання агульнага і спецыяльнага прызначэння для сельскай і лясной гаспадаркі.

Прадпрыемствы, якія ажыццяўляюць рамонт тэхнікі, пастаўку запчастак і забеспячэнне сельгасарганізацый, аб'ядноўвае "Белаграсэрвіс". У яго ўваходзяць 125 арганізацый, у тым ліку 87 райаграсэрвісаў, 13 райсельгасхімій, па чатыры мотарамонтныя і рамонтныя заводы.

Арганізацыі аграсэрвісу праводзяць рамонт складаных паломак, устараніць якія немагчыма ва ўмовах сельгасарганізацый. Для патаннення такога рамонту штогод прадугледжваецца фінансаванне за кошт сродкаў рэспубліканскага бюджэту. На базе 31 арганізацыі аграсэрвісу створаны тэхнічныя цэнтры заводаў-вытворцаў. Акрамя таго, заводамі сфарміраваны падменны фонд тэхнікі.

Пасля азнаямлення з работай "Мазыртэхсэрвісу" кіраўнік дзяржавы правядзе семінар-нараду па тэме работы аграсэрвісаў і падрыхтоўкі тэхнікі да палявых работ. Цяпер у сельгасарганізацыях краіны эксплуатуецца каля 212 тыс. сельгасмашын і абсталявання. За апошнія 30 гадоў узровень аснашчанасці сельгастэхнікай высокай магутнасці значна павялічыўся. Колькасць трактароў магутнасцю 250 і больш конскіх сіл вырасла з 10 % да 21 %.

Вынікі вялікай камандзіроўкі ў Гомельскую вобласць, а таксама праведзеныя раней мерапрыемствы і даклады па розных пытаннях рэгіянальнага характару стануць у тым ліку асновай для фарміравання парадку дня яшчэ аднаго вялікага мерапрыемства ў Прэзідэнта. На нарадзе "Адзін раён - адзін праект" давядзецца сур'ёзна абмеркаваць перспектывы развіцця беларускіх рэгіёнаў.