На канферэнцыі АБСЕ Мінск выступіў за дыялог у сферы бяспекі

Архітэктура бяспекі, якую дзесяцігоддзямі выбудоўвалі папярэднія пакаленні, разбурана, канстатаваў намеснік міністра замежных спраў Беларусі Ігар Сякрэта, выступаючы на канферэнцыі АБСЕ ў Вене.

Дыпламат адзначыў згубныя вынікі настойлівага, маніякальнага прасоўвання аднабокай "натацэнтрычнай" мадэлі бяспекі і прынцыпу "моцны заўсёды мае рацыю".

"Да чаго прывёў такі стан спраў, мы ўсе бачым. Рэжым кантролю над звычайнымі ўзбраеннямі ў Еўропе сышоў у гісторыю. Механізмы ўмацавання даверу і бяспекі паралізаваныя. Перагаворныя фарматы не выкарыстоўваюцца альбо канфрантацыйна інструменталізуюцца. Ганебная практыка naming and shaming у дырэктыўных органах АБСЕ толькі паглыбляе ўзаемнае адчужэнне. Заўважце, АБСЕ бачная сёння пераважна толькі на постсавецкай прасторы. А што ж з іншымі дзяржавамі Еўропы - там няма пытанняў па выбарах, няма праблем з нелегальнай міграцыяй, няма праблем у эканоміцы, экалагічная сітуацыя не змянілася? Нахіл у дзейнасці АБСЕ на краіны СНД відавочны, і гэта трэба змяняць", - адзначыў Ігар Сякрэта.

Беларускі дыпламат падкрэсліў, што прагрэс магчымы толькі праз супрацоўніцтва, гатоўнасць да кампрамісаў і ўзаемапаважлівы дыялог. Мінск валодае палітычнай воляй для такога падыходу і чакае аналагічнага настрою ад усіх дзяржаў - удзельнікаў АБСЕ.