У Мінску з'явіўся новы шматпрофільны медыцынскі цэнтр

У Мінску рэалізуецца маштабная праграма мадэрнізацыі сістэмы аховы здароўя. Адзін з самых буйных праектаў - шматпрофільны медыцынскі цэнтр на вуліцы Маякоўскага, які 31 ліпеня расчыніў свае дзверы.

У медцэнтры размясціліся адразу тры ўстановы аховы здароўя - 10-я гарадская стаматалагічная паліклініка, гарадскі эндакрыналагічны цэнтр, а таксама цэнтр пластычнай хірургіі і медыцынскай касметалогіі.

"Мы плануем укараняць новыя паслугі, у прыватнасці, трансплантацыю валасоў. Гэтая аперацыя сёння з'яўляецца вельмі запатрабаванай, а ў Беларусі яе выконваюць лічаныя спецыялісты. З'яўляецца і новае абсталяванне ў сферы дэрматаанкалогіі. У нас ёсць унікальная сістэма - відэадэрматаскапічная - для сканіравання і карціравання ўсяго цела, якая дазваляе адсачыць усе новаўтварэнні і кантраляваць іх", - расказала галоўны ўрач клінічнага цэнтра пластычнай хірургіі і медыцынскай касметалогіі г. Мінска Наталля Пастаялка.

У новай паліклініцы размесцяцца стаматалагічныя комплексы, ультрагукавыя апараты, а таксама абсталяванне для зубатэхнічнай лабараторыі. Эндакрыналагічны цэнтр пашырыць магчымасці дыягностыкі і лячэння пацыентаў з цукровым дыябетам. А цэнтр пластычнай хірургіі - адзіны ў сваёй сферы, дзе можна будзе атрымаць кваліфікаваную меддапамогу ў поўным аб'ёме.