Рэгіён, які можа карміць усю Беларусь - Брэсцкай вобласці 85 гадоў

Заходнія вароты Беларусі, важны турыстычны, транзітны і аграпрамысловы рэгіён з багатым гістарычным мінулым. Брэсцкай вобласці 85 гадоў. Жыхароў рэгіёна павіншаваў Прэзідэнт.

Аляксандр Лукашэнка падкрэсліў, што гэта зямля з унікальнай гісторыяй і багатай культурна-духоўнай спадчынай, на якой спрадвеку жылі таленавітыя і працавітыя людзі.

Брэстчына - рэгіён з развітай інфраструктурай, вялікім эканамічным і турыстычным патэнцыялам - лідар па многіх паказчыках у краіне.

Галоўнай пляцоўкай вялікага свята ў горадзе над Бугам стаў спарткомплекс "Вікторыя". Побач размясцілася вялікая выстава дасягненняў кожнага раёна вобласці. Прапанавалі самую разнастайную прадукцыю - ад легендарнага маларыцкага грачаніка і малочных вырабаў да прэміксаў і суперканцэнтратаў для жывёл. Таксама тут можна было азнаёміцца з унікальнымі інавацыйнымі распрацоўкамі. Арганізавалі для жыхароў і гасцей горада майстар-класы, тэатралізаванае шоу, канцэртную праграму лепшых калектываў рэгіёна. Ну, а самыя лепшыя атрымліваюць свае ўзнагароды, у тым ліку статус "Ганаровы грамадзянін Брэсцкай вобласці".

Удзельная вага рэгіёна ў ВУП краіны складае амаль 12 %. У вобласці налічваецца каля 2 тысяч прамысловых прадпрыемстваў і звыш 280 сельгасарганізацый. Брэстчына - важны аграпрамысловы рэгіён Беларусі, уваходзіць у тройку лепшых у краіне. Гэта край з багатай гісторыяй і ўнікальнымі прыроднымі комплексамі.