Сяўба кукурузы завершана ў Мінскай вобласці

Сельгазарганізацыі Мінскай вобласці гэтымі днямі актыўныя на вясновых палявых працах. Аграрыі Цэнтральнага рэгіёна першымі ў краіне завяршаюць сяўбу кукурузы. Агульная плошча - 275 тысяч гектараў. Больш як 40 % з іх адводзіцца на збожжа.

Так, у гаспадарцы "Пяцігор'е" агракамбіната "Дзяржынскі" завяршылі сяўбу на апошніх палях, якія размешчаны ў Валожынскім раёне. Усяго ў прадпрыемства 2 600 гектараў пад кукурузу. Пры гэтым аграрыі робяць акцэнт і на іншых культурах, якія маюць стратэгічнае для АПК значэнне: гэта рапс (дарэчы, ён добра перазімаваў), люцэрна і сланечнік.

У дапамогу аграрыям гэтым летам і восенню новыя машыны "Гомсельмаш". Напярэдадні сельгазарганізацыі Мінскай вобласці атрымалі 80 новых збожжаўборачных і кормаўборачных камбайнаў.