У Дубровенскім раёне праверылі, як ідзе падрыхтоўка да пасяўной

Прыкласці ўсе намаганні, каб правесці пасяўную кампанію якасна і ў аптымальны тэрмін - гэтую важную задачу зараз вырашаюць беларускія аграрыі. Ад таго, наколькі зладжана спрацуюць усе сельскагаспадарчыя службы, залежыць, якім будзе каравай 2025 года.

Забяспечанасць насеннем, падрыхтоўка тэхнікі, кадравыя пытанні сталі асноватворнымі на выязным пасяджэнні Віцебскага аблвыканкама, якое прайшло ў Дубровенскім раёне. Прадстаўнікі ўсіх раёнаў пабывалі на мехдварах, азнаёміліся з ходам вяснова-палявых работ. Пад яравы клін у Віцебскай вобласці адведзена каля 320 тыс. га. Да выбарачнай сяўбы прыступілі некалькі гаспадарак у Гарадоцкім і Шумілінскім раёнах.

"Пад ураджай 2025 года ў гаспадарцы неабходна пасеяць 2400 га ярыны збожжавых, зернебабовых, кармавых культур, лёну. Механізатары ў нас добрасумленныя. Калі пачынаецца сезон, то рабочы дзень у нас з шасці гадзін раніцы. Зарплата нядрэнная, я думаю, што за такую зарплату можна працаваць", - распавяла Наталля Шэндрык, дырэктар ААТ "Якубава-Агра".

У дапамогу гаспадаркам Віцебскай вобласці - міжраённыя механізаваныя атрады. Іх на поўначы краіны створана 5. Спектр паслуг шырокі: падрыхтоўка глебы, унясенне ўгнаенняў, уборка ўраджаю.