У "Вялікім камені" ў 2024 годзе зарэгістравалі 30 новых рэзідэнтаў

Летась Кітайска-беларускі індустрыяльны парк "Вялікі камень" прырос 30 новымі рэзідэнтамі, паведамляе БЕЛТА са спасылкай на прэс-службу Міністэрства эканомікі.

Статус рэзідэнтаў атрымалі прадпрыемствы з капіталам з Беларусі, Кітая, Ізраіля, Расіі і Германіі, якія плануюць рэалізацыю праектаў у сферах комплекснай лагістыкі, навукова-даследчых і доследна-канструктарскіх работ, прыборабудавання, медыцыны, біятэхналогій, захоўвання і апрацоўкі вялікіх даных.

Усяго на сённяшні дзень у індустрыяльным парку "Вялікі камень" працуюць 144 рэзідэнты з аб'ёмам заяўленых інвестыцый 1,5 млрд долараў і планамі па стварэнні больш чым 15,5 тыс. рабочых месцаў. Гаспадарчую дзейнасць пачалі звыш 50 арганізацый, якія ўжо выходзяць на поўную загрузку магутнасцяў.

Як адзначылі ў эканамічным ведамстве, у 2024 годзе быў забяспечаны рост усіх ключавых паказчыкаў работы рэзідэнтаў "Вялікага каменя". Так, сума выплачаных падаткаў, збораў і плацяжоў вырасла ў 1,7 раза, выручкі  ад рэалізацыі прадукцыі - у 1,4 раза, экспарт тавараў - на 13,6 %, інвестыцыі ў асноўны капітал - на 7,1 %. Чысты прыбытак прадпрыемстваў перавысіў 100 млн рублёў.

Кітайска-беларускі індустрыяльны парк "Вялікі камень" - высокатэхналагічная міжнародная пляцоўка для вядзення бізнесу, размешчаная за 25 км ад Мінска, з сучаснай прамысловай архітэктурай, даступнай інфраструктурай і экалагічнымі рашэннямі.

Індустрыяльны парк дае кампаніям пляцоўку з доступам да гатовай вытворчай, інжынерна-транспартнай, мытнай і сацыяльна-адміністрацыйнай інфраструктуры, значнымі падатковымі прэферэнцыямі і асаблівай сістэмай абслугоўвання бізнесу.