"Казка пра вандроўнага музыканта" да 90-годдзя Альфрэда Шнітке

Музычная капэла "Санорус", заслужаны калектыў Беларусі, да 90-годдзя Альфрэда Шнітке падрыхтавала новы праект - "Казку пра вандроўнага музыканта". Музычна-візуальнае дзейства адбылося ў Нацыянальнай школе прыгажосці.

Настрой скрыпічны і псіхалагічны. Творы Альфрэда Шнітке патрабуюць ад музыкантаў не толькі прафесійнай канцэртнай формы, але і паглыблення ў асаблівае "шніткаўскае" вымярэнне. З аднаго боку - змрочнае, з другога - крыштальна наіўнае.

Альфрэд Шнітке - адзін з самых загадкавых кампазітараў XX стагоддзя. У яго палітры ўсе жанры: ад класікі да авангарду. Ён нават гукі прыроды ўмеў перавесці ў музычныя творы. 

У канцэртнай праграме - юбілейным прысвячэнні генію ўзялі ўдзел квартэт духавых інструментаў, хор і камерны сімфанічны аркестр, а таксама салісты-выканаўцы. Вялікі рэпертуарны дыяпазон Шнітке музычная капэла "Санорус" вырашыла паказаць сваімі сродкамі, якіх у яе дастаткова.

Так, арыгінальны твор Шнітке "Канчэрта гроса" ўяўляе сабой музычны паядынак, дзе дзве скрыпкі быццам спаборнічаюць з аркестрам, а потым і паміж сабой.

І яшчэ адзін музычны эксперымент XX стагоддзя - харавы твор "Галасы прыроды", які быў напісаны кампазітарам для дзесяці жаночых галасоў.

Авангардныя эксперыменты Шнітке дзіўна пераплятаюцца з меладычна-пяшчотнай музыкай, якую ён пісаў да кінафільмаў, балетаў і нават мультфільмаў. Так, у праграме гучала музыка з кінастужак "Аповесць аб невядомым акцёры", "Казка вандровак", з балета "Эскізы", а таксама сюіты ў старажытным стылі і іншыя музычныя нечаканасці шматграннага таленту Шнітке.

"Казка пра вандроўнага музыканта" - гэта спроба спасцігнуць творчую спадчыну савецкага, а зараз і сусветнага кампазітара.