Індыя, Мадагаскар, Перу. Унікальнай выставай падарожнік з Жодзіна адзначае сваё 65-годдзе

Ён можа расказаць пра вясну ў Індыі і Мадагаскары, у Перу і на Карыбскіх астравах! Наш беларускі Фёдар Конюхаў і Міклуха Маклай - падарожнік з Жодзіна Генадзь Пузанкевіч аб'ехаў паўсвету і сабраў падчас падарожжаў унікальныя экспанаты і фотаздымкі. Зараз яны прадэманстраваны ў Жодзінскім краязнаўчым музеі. Там адкрылася выстава, прысвечаная 65-годдзю вандроўніка.

Мы ледзь паспелі застаць Генадзя дома. Яго сакавіцкі маршрут - Узбекістан. А на карце свету адзначаны паўсотні краін, у якіх пабываў. Афрыка, Мадагаскар, Азія, Цэнтральная Амерыка, Малайзія і Інданезія. Вандроўнік імкнецца ахапіць экзатычныя лакацыі, у планах - Галапагосы і Антарктыда!

Выйшаў на пенсію, выгадаваў дзяцей і пачаў падарожнічаць. Хтосьці скажа - справа нятанная. Зусім не мільянер, Генадзь знаходзіць спосабы перамяшчацца па планеце. Першыя падарожжы здзяйсняў дзе пешшу, дзе на веласіпедзе, дзе на спадарожных машынах. Навучыўся "лавіць" чыгуначныя і авіяквіткі на зніжках. Асвоіў кіраванне яхты і здзейсніў кругасветнае падарожжа з напарнікам!

Вопытам і ўражаннямі сваіх падарожжаў Генадзь Пузанкевіч дзеліцца. У Жодзінскім краязнаўчым музеі адкрылася выстава ў гонар 65-годдзя вандроўніка. Экспанаты з далёкіх краін - у вітрынах і фотаэкспазіцыя з унікальнымі кадрамі іншаземнай прыроды і побыту мясцовых жыхароў. Але галоўныя "багацці" Генадзя Канстанцінавіча - у яго дома!

Дзясяткі фотаальбомаў і цэлая сцяна-фотавыстава - за кожным здымкам свая ўнікальная гісторыя сустрэч і звычаяў, радасных уражанняў і... небяспекі! З асаблівым пачуццём успамінае Пузанкевіч, як гасцяваў у племені канібалаў. Спазнаў і перадае іншым вопыт выжывання і ў афрыканскай саване, і ў джунглях Лацінскай Амерыкі. Дарэчы, у хатняй калекцыі вандроўніка ёсць сапраўдны кракадзіл! Кракадзіл і сотні пудзілаў розных жывёл, птушак, насякомых.

Таксідэрміст - рэдкая прафесія. У ёй Генадзь Пузанкевіч больш за паўстагоддзя. Да яго прыязджаюць паляўнічыя, музейшчыкі з усіх рэгіёнаў Беларусі - робяць заказы.

Майстар вядзе часопіс - на сёння ў яго 11 тыс. фігурак фаўны. Кожная - як жывая, і ў гэтым асаблівае майстэрства Пузанкевіча. Яго працы нарасхват у музеях. Вось і Жодзінскі краязнаўчы можа пахваліцца калекцыяй, асабліва запатрабаванай у наведвальнікаў.

А яшчэ Генадзь Пузканкевіч будуе дамы. Ён выдатны разьбяр па дрэве і сваю уласную хату ператварыў у казачны церам. Генадзь Канстанцінавіч - ідэальнае ўвасабленне старадаўніх прыказак: дзе нарадзіўся - там і спатрэбіўся, і таленавіты чалавек - таленавіты ва ўсім.