Непрыдуманыя гісторыі. У Хатыні адкрылася выстава з асабістымі рэчамі архітэктара Леаніда Левіна

У музеі мемарыяльнага комплексу "Хатынь" адкрылася выстава пад назвай "Вайна не змагла забраць толькі любоў".

Праект прысвечаны асабістай перапісцы аднаго са стваральнікаў хатынскага помніка - заслужанага архітэктара, лаўрэата Дзяржаўнай прэміі Беларусі Леаніда Левіна.

Яго дачка Галіна аддала для экспазіцыі лісты свайго бацькі, якія ён, калі быў малым, пасылаў свайму тату на фронт. Большая ж частка экспанатаў - лірычная перапіска паміж бацькамі будучага архітэктара Хатыні. Бацька Леаніда Левіна прайшоў вайну і застаўся жывы, мама памерла ў эвакуацыі.

Непрыдуманыя гісторыі пра каханне і вернасць у ваенны час не толькі паказалі, але і агучылі на адкрыцці выставы

Акрамя лістоў экспануюцца асабістыя рэчы, фатаграфіі сям'і Левіных, а таксама першыя малюнкі будучага архітэктара, суаўтара мемарыяла "Хатынь" - яны нараджаліся падчас вайны. У 1941-м Леаніду споўнілася 5 гадоў.