Новы сезон музычнага шоу "Фактар.by" працягвае шукаць таленты

Новы сезон музычнага шоу "Фактар.by " працягвае шукаць таленты. Адборачныя этапы ўжо прайшлі ў Гродне, Брэсце, Пінску, Віцебску, Гомелі, Мазыры і Магілёве. Марафон праслухоўванняў падхапіла сталіца. Мінск стане фінальным пунктам адборачных этапаў.

Штодня каманда Белтэлерадыёкампаніі адгледжвае больш за паўсотню чалавек, якія вырашылі гучна заявіць аб сабе. Заваяваць вакальныя вяршыні прыходзяць слесары, менеджары, повары, будаўнікі. Закрануць струны душы журы спрабуюць як маладыя выканаўцы, так і тыя, каму за 60. Геаграфія вакальнага шоу ахапіла не толькі Беларусь, але і Расію. У госці на суботні кастынг зазірнула каманда з Масквы "Чараўнікі Вокса".

Хтосьці робіць толькі першыя крокі ў шоу, а для кагосьці гэта другая, трэцяя і нават пятая спроба ўдзелу. Сталіца прадоўжыць прымаць канкурсантаў да 30 чэрвеня. Перад самымі таленавітымі адчыняцца дзверы ў наступны этап да зорных настаўнікаў, дзе яны змогуць пазмагацца за месца ў камандах. Чарговы сезон "Фактар.by" прагучыць пад лічбай 5.