Пагранічная неразбярыха: сітуацыя на мяжы Беларусі з ЕС застаецца напружанай

Сітуацыя на мяжы з Еўрасаюзам застаецца напружанай. За выхадныя ў ЕС прайшло ўсяго 39 % фур ад нормы. Гэтую статыстыку прывёў Дзяржпагранкамітэт Беларусі. Вадзіцелі па-ранейшаму вымушаны праводзіць у чарзе дзясяткі гадзін. З 26 пунктаў пропуску функцыянуюць толькі 5. Польшча, Літва і Латвія знізілі прапускную здольнасць.

Згодна з абноўленымі звесткамі Дзяржпагранкамітэта краіны, уезду ў Еўрасаюз чакаюць больш за 2 300 грузавікоў. Самым загружаным напрамкам па-ранейшаму застаецца літоўскі. Там у чарзе стаіць амаль палова ад усіх аўтамабіляў на мяжы з ЕС.

Складаная сітуацыя ў пункце пропуску "Мядзінінкай" (з беларускага боку гэта "Каменны Лог"). Яго кантрольныя службы з пятніцы, 4 кастрычніка, прынялі менш за ўсё транспарту - 19 % аўто ад нормы. На ўездзе ў Польшчу ў пункце пропуску "Кукурыкі" (з беларускага боку "Казловічы") фіксуецца 700 фур, і зараз гэта самы загружаны маршрут. За выхадныя там прынялі амаль палову грузавікоў ад нормы. Прыкладна такія ж паказчыкі на латвійскім напрамку. Зараз у пагранпераходзе "Патэрніекі" (сумежная "Грыгараўшчына") уезду чакаюць 420 аўтамабіляў.

Беларусь наведалі каля мільёна жыхароў Еўропы

У той час як улады сумежных з Беларуссю дзяржаў абвастраюць сітуацыю на мяжы, еўрапейцы працягваюць карыстацца бязвізам, каб прыехаць у Сінявокую. Згодна з падлікамі беларускіх пагранічнікаў, за мінулы тыдзень (з 30 верасня па 6 кастрычніка) такой магчымасцю скарысталіся звыш 4 тыс. чалавек. Усяго ж за 2,5 года дзеяння бязвізу Беларусь наведаў без малога 1 млн жыхароў Еўропы.