Беларусь і Куба гатовыя нарошчваць узаемныя пастаўкі медыкаментаў

Мінск і Гавана нарошчваюць супрацоўніцтва па лініі фармацэўтыкі. На Кубе ўжо зарэгістравана больш за 50 беларускіх лекаў. І гэта праца працягваецца.

Умацаванне сувязяў у гэтай і іншых сферах бакі абмеркавалі 21 мая ў парламенце на сустрэчы спікера Палаты прадстаўнікоў Ігара Сергеенкі з паслом Кубы ў Беларусі. Востраў свабоды славіцца высокім узроўнем развіцця медыцыны, тут вырабляюць якасныя медыкаменты. Заакіянскія партнёры Беларусі гатовыя нарошчваць пастаўкі айчынных прэпаратаў на свой рынак. Больш за тое, яны гатовыя стаць акном для прасоўвання беларускіх медыкаментаў у рэгіёне Лацінскай Амерыкі.

Куба можа стаць пляцоўкай для прасоўвання на шырокі лацінаамерыканскі рынак не толькі беларускіх лекаў, але і іншай прадукцыі, у тым ліку трактароў. Беларусь для Кубы з'яўляецца важнай пляцоўкай.

Мінск і Гавана заўсёды падтрымліваюць адно аднаго на міжнароднай арэне. Беларускія парламентарыі не раз прымалі заявы супраць блакады Кубы. Узаемная падтрымка дапамагае Беларусі наладжваць эканамічныя сувязі, адкрываць для Кубы еўразійскі рынак. Нагадаем, краіна мае статус назіральніка ў ЕАЭС.