Турчын заявіў аб прыярытэтнасці і доўгатэрміновасці стратэгічнага партнёрства Беларусі і Расіі

Прэм'ер-міністр Беларусі Аляксандр Турчын у Маскве на перамовах з прэм'ер-міністрам Расіі Міхаілам Мішусціным заявіў аб прыярытэтнасці і доўгатэрміновасці беларуска-расійскага стратэгічнага партнёрства, паведамляе БЕЛТА.

"Характэрнай асаблівасцю адносін, якія склаліся паміж нашымі краінамі і народамі, з'яўляецца тое, што свае першыя візіты пасля выбараў альбо пасля прызначэння кіраўніцтва Рэспублікі Беларусь традыцыйна робіць менавіта ў Расійскую Федэрацыю. Гэта наглядна сведчыць аб прыярытэтнасці і доўгатэрміновасці беларуска-расійскага стратэгічнага партнёрства", - сказаў Аляксандр Турчын.

Ён нагадаў, што мінулы год быў адзначаны важнымі вехамі для двухбаковых адносін Беларусі і Расіі: 25-годдзем падпісання Дагавора аб стварэнні Саюзнай дзяржавы і 30-годдзем Дагавора аб сяброўстве, добрасуседстве і супрацоўніцтве паміж Беларуссю і РФ. "Да гэтых юбілейных дат мы падышлі з адчувальнымі вынікамі, што яшчэ раз пацвярджае правільнасць выбранай кіраўнікамі дзяржаў мадэлі Саюзнай дзяржавы, якая на сённяшні дзень з'яўляецца адным з самых узорных прыкладаў эканамічнай інтэграцыі не толькі на постсавецкай прасторы, але і ва ўсім свеце. У сувязі з гэтым імкнемся  да  дакладнага выканання асноўных напрамкаў рэалізацыі саюзнага дагавора на 2024-2026 гады. Гэтыя дакументы - наш арыенцір, дарожная карта для далейшай пабудовы саюзнай дзяржавы", - падкрэсліў прэм'ер-міністр Беларусі.

Ён канстатаваў, што Расія для Беларусі - асноўны гандлёвы партнёр, а летась былі дасягнуты рэкордныя паказчыкі ўзаемнага тавараабароту. Аляксандр Турчын дадаў, што перамовы прэм'ер-міністраў дзвюх краін пройдуць па шырокім пераліку пытанняў.