Прэзідэнт Беларусі праводзіць перамовы з губернатарам Калінінградскай вобласці

З саюзнага парадку дня пачынаецца новы рабочы тыдзень у Палацы Незалежнасці. У Мінску знаходзіцца дэлегацыя Калінінградскай вобласці Расіі. Аляксандр Лукашэнка праводзіць перамовы з губернатарам Аляксеем Беспразванных. Рэгіён для нас блізкі. Беларуская дыяспара ў Калінінградзе адна з самых буйных. Гэта дапамагае развіваць двухбаковае супрацоўніцтва, якое не паставілі на паўзу нават заходнія санкцыі. Мінск і Калінінград у сілу геаграфічнага становішча лепш за іншых адчулі на сабе спробу заблакіраваць транзітныя патокі. Аднак партнёрам удаецца перабудоўваць лагістыку. Гэта ўплывае на ўзаемны гандаль. Але раздзяліць нас штучныя бар'еры не змаглі.

"Вы можаце на нас спадзявацца ў тым, на што мы здольныя ў Беларусі", - запэўніў губернатара Калінінградскай вобласці Аляксандр Лукашэнка.

У Калінінградзе добра ведаюць беларускія прадукты. Тут працуе наша тэхніка: па горадзе курсіруюць аўтобусы МАЗ. Закупляюць калінінградцы і нашы будматэрыялы. У нас добры запас трываласці ў супрацоўніцтве, напрацаваны гадамі. Гэта сувязі ў аграрным сектары, будаўніцтве, прамысловая кааперацыя. Важна аднавіць дасанкцыйны ўзровень гандлю. З-за абмежаванняў на перавозкі аўта- і чыгуначным транспартам стаўка зроблена на развіццё марскіх зносін, адзначыў расійскі губернатар.