Прэзідэнт Зімбабвэ Эмерсан Мнангагва прыбыў з візітам у Беларусь

Прэзідэнт Зімбабвэ Эмерсан Мнангагва прыбыў з рабочым візітам у Беларусь, паведамляе БЕЛТА.

Як адзначаецца на сайце пасольства Беларусі ў Зімбабвэ, зараз палітычнае супрацоўніцтва дзвюх краін носіць актыўны характар, адзначаецца супадзенне пазіцый па шэрагу міжнародных пытанняў. Прэзідэнт Зімбабвэ Эмерсан Мнангагва наведваў Беларусь у ліпені 2015 года ў якасці віцэ-прэзідэнта і ў студзені 2019 года ўжо як кіраўнік дзяржавы.

Прэзідэнт Беларусі Аляксандр Лукашэнка наведаў Зімбабвэ з дзяржаўным візітам у пачатку 2023 года. Тады былі падпісаны пагадненні ў галіне прамысловасці, гандлю, сельскай гаспадаркі, энергетыкі, транспарту і здабычы карысных выкапняў. Праведзена цырымонія перадачы тэхнікі беларускіх вытворцаў у рамках праграмы па механізацыі фермерскіх гаспадарак Зімбабвэ.

У далейшым бакі абменьваліся візітамі на розных узроўнях, атрымала развіццё супрацоўніцтва па лініі дзелавых колаў. Было падпісана пагадненне аб стварэнні сумеснай пастаяннай камісіі па супрацоўніцтве.

Сёлета ў красавіку Зімбабвэ наведала беларуская дэлегацыя на чале з намеснікам прэм'ер-міністра Віктарам Каранкевічам. Цэнтральнай падзеяй стала сустрэча з прэзідэнтам гэтай афрыканскай краіны. Бакі абмеркавалі перспектывы развіцця супрацоўніцтва, у тым ліку рэалізацыю трэцяй фазы праграмы механізацыі сельскай гаспадаркі Зімбабвэ з выкарыстаннем беларускай тэхнікі.

Эмерсану Мнангагву быў перададзены асабісты ліст Прэзідэнта Беларусі Аляксандра Лукашэнкі з афіцыйным запрашэннем наведаць краіну ў маі 2025 года. Кіраўнік Зімбабвэ тады з падзякай прыняў прапанову, пацвердзіўшы гатоўнасць да візіту і папрасіў перадаць Аляксандру Лукашэнку найлепшыя пажаданні, а таксама выказаў упэўненасць у поспеху маючай адбыцца сустрэчы ў Беларусі.