Аляксандр Лукашэнка прыбыў з афіцыйным візітам у Алжыр

Прэзідэнт Беларусі Аляксандр Лукашэнка прыбыў з афіцыйным візітам у Алжырскую Народную Дэмакратычную Рэспубліку. Гэта першы візіт на вышэйшым узроўні ў гісторыі адносін паміж дзвюма краінамі, піша БЕЛТА.

Ля трапа Прэзідэнта сустрэў старшыня Савета нацыі Алжырскай Народнай Дэмакратычнай Рэспублікі Насеры Азуз. Кіраўнік беларускай дзяржавы Аляксандр Лукашэнка і Прэзідэнт Алжыра Абдэльмаджыд Тэбун правядуць перагаворы ў вузкім і пашыраным складах з акцэнтам на паглыбленне гандлёва-эканамічнага супрацоўніцтва і рэалізацыю ўзаемавыгадных двухбаковых праектаў. Плануецца абмеркаваць перспектывы паставак тэхнікі і кааперацыі, узаемадзеяння ў аграпрамысловым комплексе, медыцыне, адукацыі і гуманітарнай сферы ў цэлым.

Па выніках перагавораў лідараў краін і візіту ў цэлым будуць падпісаны двухбаковыя дакументы па развіцці супрацоўніцтва ў розных сферах.

Алжыр - ужо чацвёртая дзяржава, якую Прэзідэнт наведвае ў час вялікай камандзіроўкі па краінах блізкага і далёкага замежжа. У гэту краіну Аляксандр Лукашэнка прыбыў з Амана, дзе ён знаходзіўся з рабочым візітам. Да гэтага беларускі лідар наведаў М'янму і Кыргызстан. Напярэдадні візіту Аляксандра Лукашэнкі ў Алжыры прайшоў двухбаковы бізнес-форум, у якім прымалі ўдзел больш за сотню прадстаўнікоў міністэрстваў, прадпрыемстваў і арганізацый з абодвух бакоў. Праведзены шматлікія сустрэчы і перагаворы на розных узроўнях.

У каментарыі журналістам кіраўнік МЗС Беларусі Максім Рыжанкоў, які таксама знаходзіцца ў Алжыры, заявіў, што ў яго самыя вялікія чаканні ад гэтага візіту, а перспектывы супрацоўніцтва вельмі сур'ёзныя. Абмяркоўваюцца не толькі магчымасці пашырэння супрацоўніцтва ў гандлі і пастаўках тавараў, але і сумесная вытворчасць прадукцыі, у тым ліку з прыцэлам на рынкі іншых краін Афрыкі. Тэрыторыя Алжыра можа стаць яшчэ адным хабам для прасоўвання айчынных тавараў на гэтым кантыненце.

Дыпламатычныя адносіны Беларусі з Алжырам устаноўлены ў кастрычніку 1995 года. Сустрэчы кіраўнікоў дзяржаў праводзіліся ў верасні 2000 года ў час Саміту тысячагоддзя ААН у Нью-Ёрку і ў верасні 2006 года ў рамках Саміту Руху недалучэння ў Гаване.

У 2003, 2024 і 2025 гадах адбыліся візіты міністра замежных спраў у Алжыр.

У лютым 2018 года праведзены рабочы візіт міністра замежных спраў Алжыра ў Беларусь, у ходзе якога былі арганізаваны сустрэчы з Прэзідэнтам і старшынёй Савета Рэспублікі. Тады Аляксандр Лукашэнка заявіў аб неабходнасці надаць сур'ёзны імпульс развіццю адносін паміж Беларуссю і Алжырам і хаця б аднавіць ранейшы ўзровень супрацоўніцтва. "Мы, калі на гэта будзе ваша воля і садзейнічанне, гатовы па нашых тэхналогіях працаваць і ў сферы прамысловасці, і ў сферы сельскай гаспадаркі. І не проста пастаўляць вам прадукцыю, але і ствараць адпаведныя магутнасці разам з вамі на тэрыторыі Алжыра", - запэўніў беларускі лідар.

Па выніках 2024 года тавараабарот склаў крыху больш як 49 млн долараў, з якіх практычна ўвесь аб'ём - гэта беларускі экспарт.

У лютым 2018 года падпісана пагадненне аб стварэнні беларуска-алжырскай сумеснай камісіі па гандлёва-эканамічным і навукова-тэхнічным супрацоўніцтве (уступіла ў сілу ў 2019 годзе). У красавіку 2025 года ў Мінску праведзена яе першае пасяджэнне.