Лідар КНДР перадаў у падарунак Аляксандру Лукашэнку шаблю і вялікую вазу

Прэзідэнт Беларусі Аляксандр Лукашэнка падчас афіцыйнага візіту ў КНДР і Старшыня дзяржаўных спраў Карэйскай Народна-Дэмакратычнай Рэспублікі Кім Чэн Ын абмяняліся падарункамі, піша БЕЛТА.

Лідар КНДР перадаў кіраўніку беларускай дзяржавы ў падарунак шаблю і вялікую вазу, дэкарыраваную ў традыцыйнай для гэтай краіны стылістыцы з выкарыстаннем мноства разнавіднасцяў ракавінак, а таксама сувенірную залатую манету, вырабленую з нагоды візіту Прэзідэнта Беларусі ў КНДР.

Аляксандр Лукашэнка таксама ўручыў Кім Чэн Ыну падарункі ад беларускага боку. Традыцыйна гэта былі айчынныя прадукты харчавання, у тым ліку шакалад "Прэзідэнт", беларускі зэфір і чорны хлеб.

Асаблівым падарункам для лідара КНДР стаў аўтамат VSK. "Стралковая зброя заўсёды патрэбна будзе для салдата", - сказаў Аляксандр Лукашэнка, адзначыўшы, што ў Беларусі арганізавана вытворчасць уласнай стралковай зброі і боепрыпасаў.

Кім Чэн Ына зацікавіў гэты падарунак. Лідар КНДР выказаў словы падзякі, уважліва вывучыў аўтамат, удакладніў яго характарыстыкі і нават паспрабаваў перазарадзіць."На ўсялякі выпадак, калі ворагі з'явяцца", - адзначыў беларускі лідар.