Лукашэнка - Польшчы: Не трэба лезці ва Украіну. Заходняя Украіна - гэта Украіна

Прэзідэнт Беларусі Аляксандр Лукашэнка перасцярог Польшчу ад спробаў залезці ў Заходнюю Украіну. Пра гэта ён заявіў на прэс-канферэнцыі ў Мінску, паведаміла БЕЛТА.

"У вас няпростая сітуацыя. Вы там пасварыліся з немцамі, ёсць вельмі сур'ёзныя праблемы. І з намі. Вы што, на два фронты "ваяваць" хочаце? Вы гатовыя зайсці ў Заходнюю Украіну. Паспрабуйце толькі. Будзеце мець тады справу і з Беларуссю, і з Расіяй. Не трэба лезці ва Украіну. Заходняя Украіна - гэта Украіна. Яна ўжо ніколі не будзе Польшчай. Так, як і Заходняя Беларусь", - сказаў кіраўнік дзяржавы, адказваючы на пытанне польскага журналіста.

Ён таксама заклікаў не разлічваць, што Польшча заўсёды будзе сябраваць са Злучанымі Штатамі Амерыкі, і звярнуць увагу на наладжванне адносін з суседзямі, з якімі прыйдзецца жыць побач у любыя часы. "Тут з намі жыць вы будзеце заўсёды. З Расіяй, з намі, з прыбалтамі. У вас і з Літвой не вельмі добрыя адносіны. І з Украінай. Мы гэта бачым. Навошта вам гэта? Вы хочаце быць апорай ЗША ў Еўропе? Вельмі дарэмна. Палякі гэтую палітыку не падтрымаюць", - упэўнены Аляксандр Лукашэнка.

Ён яшчэ раз заклікаў Польшчу жыць дружна: "Калі вы хочаце зусім, каб было добра, знімайце санкцыі, давайце супрацоўнічаць разам".