Лукашэнка расказаў праўду пра тое, як беглыя рыхтавалі акцыі ў Варшаве да дня выбараў

Прэзідэнт Беларусі Аляксандр Лукашэнка, адказваючы на пытанні журналістаў 26 студзеня ў Мінску, выкрыў у аднаго з прадстаўнікоў заходніх СМІ хлусню і распавёў праўду пра тое, як беглыя рыхтавалі акцыі ў Варшаве да дня выбараў, паведамляе БЕЛТА.

Журналіст агенцтва Франс Прэс пачаў гаварыць пра тое, што ў Варшаве праходзіць масавы мітынг. Аднак Аляксандр Лукашэнка запярэчыў, што гэта мерапрыемства зусім не такое масавае, як яго спрабуюць пакзаць у заходніх СМІ, там некалькі дзясяткаў чалавек, а зусім не тысячы. "Не смяшыце людзей. Я ведаю, як гэты мітынг рыхтаваўся. Няма там мітынгу, таму што спынена фінансаванне (з боку ЗША пасля ўступлення на пасаду новага прэзідэнта. - Заўв. БЕЛТА), Трамп не даў грошы", - сказаў Прэзідэнт.

Ён звярнуў увагу, што журналістаў заходніх СМІ не раз лавілі на неаб'ектыўнасці і яны могуць даваць карцінку з вулічных акцый, у якой колькасць удзельнікаў будзе значна перабольшана, як гэта было ў Мінску ў 2020 годзе. "Усе, што вы сказалі (пра шматтысячны мітынг у Варшаве і матывацыю людзей прыйсці на яго. - Заўв. БЕЛТА), - гэта хлусня", - падкрэсліў Прэзідэнт.

Кіраўнік дзяржавы распавёў, што ад кампетэнтных органаў яму паступала інфармацыя пра тое, як рыхтавалася гэта акцыя ў суседняй сталіцы і што там цэлая бойка адбывалася: адны гаварылі, што не атрымаецца сабраць нават тысячу чалавек, таму і збірацца не варта, а іншыя ўсё роўна настойвалі.

Па словах Аляксандра Лукашэнкі, ён даручыў адпаведным службам устанавіць асобы ўдзельнікаў акцыі, якія маюць дачыненне да Беларусі. "Мы намякнулі, што іх сваякі, бацькі, родныя, блізкія жывуць тут. Вы проста падставіце сваіх людзей. А з вамі мы разбяромся, - сказаў кіраўнік дзяржавы. - Яны (патэнцыяльныя ўдзельнікі. - Заўв. БЕЛТА) на гэта адрэагавалі: "Калі вы дурні, ідзіце. А мы не пойдзем. Не жадаем, каб нашы сваякі падставіліся (яны ў Беларусі жывуць), ды і самі жадаем вярнуцца калісьці ў краіну. Можа быць, пры гэтым Прэзідэнце".

Іншае пытанне ад прадстаўніка гэтага французскага інфармагенцтва датычылася пачатку ўзброенага канфлікту ва Украіне 24 лютага 2022 года і руху расійскіх войскаў. Паводле слоў Прэзідэнта, меркаванне журналіста на гэты конт можна назваць дылетанцкім. Аляксандр Лукашэнка чарговы раз растлумачыў: "Гэта былі войскі не беларускія. Я адказваю за беларускія войскі. І калі вы думаеце, што я, нягледзячы на нашы блізкія адносіны з Уладзімірам Уладзіміравічам Пуціным, сяджу ў Генштабе Расіі і на карце малюю рух расійскіх узброеных сіл, слухайце, вы тады дылетант. Гэта такія рэчы, якія робяцца ў цішыні і робяцца мінімальнай колькасцю людзей. Без замежнага ўмяшання, без іншаземцаў".

Кіраўнік дзяржавы падкрэсліў, што не шкадуе аб сваіх рашэннях у той перыяд 2022 года, таму што галоўнае - што Беларусь не была ўцягнута ў вайну.