Прэзідэнт Беларусі правёў сустрэчу з рэктарам Пекінскага ўніверсітэта

Беларускі лідар Аляксандр Лукашэнка правёў сустрэчу з рэктарам Пекінскага ўніверсітэта Гун Ціхуанам, піша БЕЛТА.

Гэтымі днямі дэлегацыя Пекінскага ўніверсітэта наведвае Беларусь. Ключавой падзеяй праграмы візіту стане адкрыццё ў БДУ Беларуска-кітайскага цэнтра фундаментальных навуковых даследаванняў.

Як паведамлялася, 25 чэрвеня 2024 года Аляксандр Лукашэнка на сустрэчы з сакратаром партыйнага камітэта Пекінскага ўніверсітэта Хаа Пінам і прадстаўнікамі кітайскіх універсітэтаў падтрымаў ініцыятыву ВНУ Беларусі і КНР наконт стварэння Цэнтра фундаментальных даследаванняў. "Упэўнены, што яго дзейнасць стане новым вітком навукова-тэхнічнага развіцця. І з улікам таго, што ў нас абсалютна няма закрытых тэм ад нашых сяброў у Кітаі, мы гатовы дзяліцца ў тым ліку і тымі тэхналогіямі, якімі Кітай сёння не валодае. Вы - нашы сябры, вы - нашы браты, вы на нас можаце разлічваць", - сказаў Прэзідэнт.

Першым крокам да рэалізацыі праекта стала стварэнне ў лістападзе 2024 года кітайскага філіяла цэнтра на базе Пекінскага ўніверсітэта. Адкрыццё аналагічнай установы ў Беларусі на базе БДУ дасць магчымасць забяспечыць эфектыўнае ўзаемадзеянне вучоных дзвюх краін павысіць якасць сумеснага навучання спецыялістаў і падрыхтоўкі навуковых кадраў. Чакаецца, што вынікам дзейнасці цэнтра стануць шматпрофільныя, міждысцыплінарныя фундаментальныя і прыкладныя распрацоўкі і даследаванні.

Пекінскі ўніверсітэт - буйнейшая і важнейшая вышэйшая навучальная ўстанова Кітая. Ён быў заснаваны ў 1898 годзе. Ва ўніверсітэце праходзяць навучанне амаль 50 тыс. студэнтаў, сярод якіх больш за 3 тыс. - іншаземцы.