Прэзідэнт Беларусі ўручыў дзяржузнагароды жанчынам з розных сфер дзейнасці і рэгіёнаў краіны

Прэзідэнт Беларусі Аляксандр Лукашэнка ўручыў дзяржаўныя ўзнагароды 30 жанчынам з розных сфер дзейнасці і рэгіёнаў краіны. Урачыстая цырымонія, па традыцыі прымеркаваная да свята 8 Сакавіка, адбылася 10 сакавіка ў Палацы Незалежнасці, паведампляе БЕЛТА.

У гэты дзень, як адзначыў кіраўнік дзяржавы, у Зале ўручэння дзяржузнагарод пануе дзівосная атмасфера вясны, прыгажосці і радасці. Прэзідэнт растлумачыў, што для правядзення цырымоніі разглядаліся некалькі варыянтаў даты, але, каб прадоўжыць свята для жанчын, вырашана было зрабіць гэта 10 сакавіка.

"Вы ўвасабляеце сабой нашу краіну - любімую Беларусь. Прыгожую, таленавітую, разумную, накіраваную ў светлую будучыню, дзе непарушныя нармальныя, традыцыйныя адносіны, асабліва сямейныя. А дзеці для нас - гэта наогул святое", - заявіў Аляксандр Лукашэнка.

Пераважная большасць з прысутных на цырымоніі жанчын удастоена галоўнай узнагароды - ордэна Маці. "Вы падарылі жыццё і дастойна выхавалі пяцярых і больш дзяцей. Схіляюся перад вамі, таму што ведаю, што такое выхоўваць дзіця. Гэта сапраўдны штодзённы подзвіг, - падкрэсліў Прэзідэнт. - Бяссонныя ночы, бясконцыя трывогі па прычыне і без. Велізарны гонар, калі сыны даюць воінскую прысягу. І бязмерная радасць, калі вы бачыце сваіх дачок у вясельных сукенках. А потым у ваша жыццё прыходзяць унукі і аказваецца, што матчына сэрца выйшла на новы, бясконцы круг любові, клопату, пяшчоты. І вось за гэта мы, мужыкі, перш за ўсё ўдзячныя вам".

Прэзідэнт уручыў ордэн Маці 21 прадстаўніцы ўсіх абласцей і Мінска. Сярод іх  вядучы інжынер-праекціроўшчык групы інжынерных сетак і камунікацый філіяла "Столінбудпраект" прадпрыемства "Інстытут Брэстбудпраект" Таццяна Вабішчэвіч, настаўнік-дэфектолаг Азярычынскай базавай школы Пухавіцкага раёна Дзіна Філімонава, урач-афтальмолаг амбулаторнага цэнтра дзяржаўнай установы "432 ордэна Чырвонай Зоркі галоўны ваенны клінічны медыцынскі цэнтр Узброеных Сіл Рэспублікі Беларусь" Валянціна Гур'янава.

Кіраўнік дзяржавы ўзнагародзіў ордэнам Пашаны майстра вытворчага навучання Гомельскага дзяржаўнага аграрна-тэхнічнага каледжа Таццяну Ярэц, ордэнам Францыска Скарыны - вядучага майстра сцэны Нацыянальнага акадэмічнага тэатра імя Янкі Купалы Зінаіду Зубкову, медалём Францыска Скарыны - генеральнага дырэктара Нацыянальнага акадэмічнага Вялікага тэатра оперы і балета Кацярыну Дулаву, рэктара Беларускага дзяржаўнага ўніверсітэта культуры і мастацтваў Наталлю Карчэўскую і саліста духавога аркестра ГУУС Мінгарвыканкама Ганну Благаву.

Акрамя таго, прысвоены ганаровыя званні Беларусі. Заслужаным работнікам адукацыі сталі настаўнік беларускай мовы і літаратуры Старасельскай сярэдняй школы Мінскага раёна Ала Барчук і настаўнік рускай мовы і літаратуры гімназіі № 1 Ліды Таццяна Глыздова, заслужаным будаўніком - дырэктар КУП "Упраўленне капітальнага будаўніцтва Мінгарвыканкама" Анжэла Бабарыка, заслужаным майстрам спорту - спартсмен-інструктар нацыянальнай каманды Беларусі па стральбе з лука Рэспубліканскага цэнтра алімпійскай падрыхтоўкі па стралковых відах спорту Ганна Марусава.

Напрыканцы цырымоніі кіраўнік дзяржавы заўважыў, што для жанчыны вельмі важная прыгажосць: "Таму я жадаю вам быць заўсёды прыгожымі, такімі, як сёння, каб вамі захапляліся мы, мужыкі. Шчасця, поспехаў і прыгажосці вам!"