У Балівіі аб'яўлены рэжым надзвычайнай сітуацыі з-за наймацнейшых паводак, што накрылі краіну

Улады Балівіі аб'явілі рэжым надзвычайнай сітуацыі з-за наймацнейшых паводак, што накрылі краіну. Аб гэтым рашэнні аб'явіў прэзідэнт краіны Луіс Арсэ, піша БЕЛТА са спасылкай на агенцтва Reuters.

"Стыхійныя бедствы вымушаюць аб'явіць надзвычайную сітуацыю ў краіне. Сёння мы апублікавалі адпаведны ўказ, які паскорыць работу ўсіх, хто залучаны ў барацьбу з нанесенай шкодай", - сказаў прэзідэнт Балівіі.

Арсэ таксама паведаміў, што з лістапада 2024 года з-за наступстваў стыхіі ў краіне загінуў 51 чалавек, прапаўшымі без весткі лічацца 8 чалавек. Пацярпелі таксама звыш 370 тыс. сем'яў, пераехаць прыйшлося больш чым 100 тыс. грамадзян.

Паводле яго слоў, сур'ёзны матэрыяльны ўрон быў прычынены 209 гарадам у 9 рэгіёнах краіны, знішчаны больш як 800 дамоў. У барацьбе з наступствамі стыхіі задзейнічалі звыш 4 тыс. чалавек. У закранутыя стыхіяй раёны ўжо дастаўлены 234 т гуманітарнай дапамогі.

На мінулым тыдні Сенат Балівіі адобрыў выдзяленне 75 млн долараў ад Лацінаамерыканскага і Карыбскага банка развіцця для ліквідацыі наступстваў паводкі.

Сезон дажджоў пачаўся ў Балівіі ў лістападзе 2024 года, за апошнія дні сітуацыя пагоршылася. Згодна з некаторымі звесткамі, размова ідзе пра наймацнейшыя за апошнія 40 гадоў дажджы.