У М'янме завершана выратавальная аперацыя. Колькасць загінуўшых вырасла да 3 600 чалавек

Колькасць загінуўшых у М'янме ў выніку землетрасення дасягнула 3 600 чалавек. Больш чым 5 тыс. пацярпелі, 60 лічацца прапаўшымі без весткі. Выратавальныя работы ў краіне завяршыліся, аднак працягваецца пошук загінуўшых і разбор завалаў.

У краіне наспявае гуманітарны крызіс. Паводле інфармацыі Упраўлення ААН па каардынацыі гуманітарных пытанняў, больш як 17 млн чалавек жывуць у пацярпелых раёнах і маюць тэрміновую патрэбу ў харчаванні, пітной вадзе, медабслугоўванні, фінансавай дапамозе і жыллі.

Землетрасенне пакінула многія раёны М'янмы без электрычнасці, тэлефоннай і сотавай сувязі, а таксама разбурыла дарогі і масты, таму ацаніць маштабы разбурэнняў на ўсёй тэрыторыі краіны дагэтуль складана.