У Столінскім раёне сутыкнуліся матацыкл і грузавік - два чалавекі загінулі

У Столінскім раёне вадзіцель-бяспраўнік на матацыкле сутыкнуўся з грузавіком, у выніку чаго загінулі два чалавекі, у тым ліку непаўналетні. Пра гэта паведаміла БЕЛТА са спасылкай на МУС.

Інцыдэнт адбыўся 26 сакавіка прыблізна а 11-й гадзіне ў вёсцы Мачуль. 22-гадовы бяспраўнік (вадзіцельскае пасведчанне не атрымліваў), кіруючы матацыклам "Мінск", паводле папярэдняй інфармацыі, рабіў апярэджанне па абочыне і сутыкнуўся з грузавіком ЗІЛ, які паварочваў направа.

У выніку ДТЗ матацыкліст і яго 17-гадовы пасажыр, вучань 11-га класа (ехаў без моташлема), загінулі. На месцы здарэння працуюць супрацоўнікі ДАІ, следча-аператыўная група.