У Віцебскай вобласці пасажыр таксі, пагражаючы забойствам, забраў у вадзіцеля 250 рублёў

У Віцебскай вобласці ўчынены разбойны напад на таксіста.

Гісторыя пачалася з таго, што жыхар Дубровенскага раёна папрасіў таксіста адвезці яго дамоў. Але на месцы прызначэння мужчына сказаў, што яму трэба схадзіць па грошы. Вадзіцель пагадзіўся пачакаць, аднак праз некалькі хвілін кліент вынес не грошы, а зброю.

"Зламыснік, пагражаючы прадметам, падобным на пісталет, прымусіў таксіста ўвайсці ў жыллё. Там ён дастаў нож і пад пагрозай забойства забраў у вадзіцеля 250 рублёў. Скарыстаўшыся момантам, таксіст змог выбегчы з дома і ўцячы на сваім аўтамабілі", - расказала падрабязнасці здарэння афіцыйны прадстаўнік УУС Віцебскага аблвыканкама Надзея Дзенісюк.

Міліцыя адрэагавала імгненна. Ужо праз дзве гадзіны пры сілавой падтрымцы байцоў АМАПа падазроны быў затрыманы. Ім аказаўся 33-гадовы непрацуючы аршанец, які раней неаднаразова судзімы. Узбуджана крымінальная справа за разбой.