Вопыт зносін з кіберзлачынцамі каштаваў мінчаніну 130 тыс. рублёў. Падрабязнасці гісторыі падману

Аферысты ў сваіх хітрыках выходзяць на новы ўзровень - адпраўляюць ахвяры "задэклараваць зберажэнні" ў іншую краіну. Усё таму, што ў Беларусі падазроныя транзакцыі праваахоўнікі адразу блакіруюць.

Удасканаленую схему махляры адпрацавалі на 36-гадовым мужчыне з Мінска. Вопыт зносін з кіберзлачынцамі каштаваў яму 130 тыс. рублёў.

Паводле звестак МУС, гісторыя падману пачыналася класічна: па тэлефоне пацярпеламу паведамілі, што на яго нібы аформілі некалькі крэдытаў. Каб іх ануляваць, мінчаніну прапанавалі запісаць відэа з адмовай ад усіх банкаўскіх аперацый. Расказваць каму-небудзь аб тым, што здарылася, забаранілі.

Далей мужчыну напалохалі маючым адбыцца вобыскам і неабходнасцю "задэклараваць зберажэнні".

"Для гэтага пацярпеламу сказалі адправіцца ў суседнюю краіну, абгрунтаваўшы тым, што ў Беларусі для яго заблакіраваны ўсе транзакцыі. Калі мужчына вярнуўся дамоў, яго пераканалі павялічыць крэдытную нагрузку і ўзяць пазыку нібы для таго, каб уяўныя ашуканцы не змаглі аформіць на яго новыя крэдыты. Частку з гэтых сродкаў ён перавёў  на "бяспечны" рахунак добраахвотна, а калі грошы з карты пачалі спісвацца без яго ўдзелу, зразумеў, што стаў ахвярай падману", - расказала начальнік АПК Фрунзенскага РУУС г. Мінска Ірына Ванюк.

У міліцыі нагадалі: калі незнаёмцы па тэлефоне патрабуюць зрабіць якія-небудзь маніпуляцыі з фінансамі, трэба неадкладна спыніць размову і паведаміць пра гэта праваахоўнікам.