Востраў Крыт ахапілі маштабныя лясныя пажары - эвакуіраваны 5 тыс. турыстаў

Маштабныя лясныя пажары ахапілі грэчаскі курортны востраў Крыт, эвакуіравана каля 5 тыс. турыстаў. Аб гэтым паведамляе БЕЛТА са спасылкай на газету Kathimerini.

Каля 230 пажарных з дапамогай верталётаў і спецтэхнікі на поўдні вострава працягваюць барацьбу з агнём, які хутка распаўсюджваецца, спальваючы лясныя масівы і знішчаючы дамы. Паведамленняў аб ахвярах і пацярпелых пакуль не паступала.

Тушэнне агню ўскладняецца моцным ветрам і складаным рэльефам мясцовасці. Дадатковыя сілы грэчаскай паліцыі і берагавой аховы былі накіраваныя ў раён стыхійнага бедства для барацьбы з пашырэннем плошчы пажараў. "Гэта вельмі складаны пажар, і ён дагэтуль не патушаны", - распавёў прадстаўнік пажарнай аховы.

Грэцыя, размешчаная ў паўднёвай частцы Еўропы, у летні перыяд часта пакутуе ад пажараў. У апошнія гады назіраецца рост разбуральных пажараў у гэтай мясцовасці, выкліканых у тым ліку наступствамі змянення клімату.