Расія прапануе аднаўленне мірных перамоў

У ноч на 11 мая скончыўся тэрмін дзеяння перамір'я, аб'яўленага Расіяй у гонар 80-й гадавіны Вялікай Перамогі. За гэты час з боку Украіны было зафіксавана больш як 9 тысяч парушэнняў рэжыму спынення агню. Нягледзячы на гэта, расійскі прэзідэнт выступіў з новай мірнай ініцыятывай на канферэнцыі ў Маскве.

Уладзімір Пуцін, прэзідэнт Расіі:

"Прапануем кіеўскім уладам аднавіць перамовы, перарваныя імі ў канцы 2022 года. Аднавіць прамыя перамовы, прычым, падкрэслю, без усякіх папярэдніх умоў. Пачаць прапануем без прамаруджання ўжо ў наступны чацвер, 15 мая, у Стамбуле - там, дзе яны праводзіліся раней, і там, дзе яны былі перарваныя".

Па словах Уладзіміра Пуціна, рашэнне зараз за ўкраінскімі ўладамі і іх куратарамі. Тыя, хто сапраўды хоча міру, не могуць не падтрымаць прапанову Масквы, дадаў расійскі лідар. Ініцыятыву Масквы пракаменціраваў Трамп. Амерыканскі лідар заявіў, што гэта патэнцыйна вялікі дзень для Расіі і Украіны.