Тыдзень студэнцкай моладзі Саюзнай дзяржавы стартаваў у Мінску

Упершыню ў Мінску гэтымі днямі звыш 100 студэнтаў з Беларусі і Расіі аб'яднаў маштабны форум студэнцкай моладзі Саюзнай дзяржавы. Яго ўдзельнікамі сталі студэнты нашай краіны і 15 расійскіх універсітэтаў, у прыватнасці, наўгародскай, пскоўскай і бранскай вышэйшых навучальных устаноў.

Тыдзень студэнцкай моладзі дзвюх краін прымеркавалі да 25-годдзя падпісання Дагавора аб стварэнні Саюзнай дзяржавы. Сёння погляды афіцыйнага Мінска і Масквы ў працы з моладдзю супадаюць па многіх вектарах: ад духоўна-маральнага і патрыятычнага выхавання да творчасці і добраахвотніцкага руху.

У рамках дыялогавай пляцоўкі "Вектары развіцця палітыкі ў Саюзнай дзяржаве" сёння адбылося падпісанне пяці пагадненняў аб узаемадзеянні і супрацоўніцтве ў галіне моладзевай палітыкі паміж БДУ і ВНУ Расіі. Тэматычны тыдзень напоўняць розныя мерапрыемствы. Кожны дзень прысвецяць асобнай тэматыцы. На парадку дня - абмеркаванне гістарычнай памяці і праўды, вынікаў расследавання генацыду беларускага народа. У цэнтры ўвагі таксама сучасныя тэндэнцыі распаўсюджвання пастпраўды, стварэнне фэйкавых навін, пытанні сямейных каштоўнасцей сярод моладзі. Завершыцца Тыдзень студэнцкай моладзі 22 лістапада.