Іран і Ізраіль працягваюць абменьвацца ракетнымі ўдарамі

Блізкі Усход палае. Усю ноч і раніцу 14 чэрвеня прыходзяць паведамленні аб узаемных атаках паміж Іранам і Ізраілем. Сотні выпушчаных ракет. "Жалезны купал" не вытрымаў. Ёсць загінуўшыя, дзясяткі параненых.

У выніку новых удараў Ізраіля па Тэгеране загінулі 60 чалавек, у тым ліку 20 дзяцей. Абодва бакі гатовы да далейшай эскалацыі і заяўляюць аб намеры абрынуць на праціўніка ўсю моц сваіх арсеналаў.

Пад раніцу суботы, 14 чэрвеня, завяршылася было чарговая, трэцяя па ліку, ракетная атака Ірана на Ізраіль і тут жа пачалася чацвёртая. Вядома аб 150-200 ударах балістыкай: іх ахвярамі сталі 4 ізраільцяніны, сама меней 70 чалавек паранены. З улікам маштабу разбурэнняў у Тэль-Авіве і іншых гарадах чалавечыя страты можна лічыць умеранымі - гэтаму спрыяе тая акалічнасць, што ў большасці тутэйшых кватэр ёсць уласныя сховішчы. Паведамляюць аб гібелі камандуючага ВМФ краіны, але пацвярджэнняў гэтаму няма. Супрацьпаветраная абарона яўрэйскай дзяржавы хоць і прадэманстравала высокую эфектыўнасць, адбіць усе ўдары не змагла.

Сістэма "Жалезны купал" аказалася перагружанай і з атакай не справілася. З прыблізна дзвюх соцень балістычных ракет, прымененых Тэгеранам, не менш за дзясятак дасягнулі цэлі. Асабліва сур'ёзна пацярпеў Тэль-Авіў: як адзначаюць мясцовыя жыхары, настолькі значных разбурэнняў у горадзе не было раней ніколі.

Вядома, што іранскія ракеты трапілі ў комплекс будынкаў Міністэрства абароны Ізраіля ў цэнтры Тэль-Авіва, адзначаны таксама пападанні ў цэнтр ядзерных даследаванняў "Дзімон". Сапраўдныя маштабы ўрону, нанесенага Ізраілю, пакуль ацаніць цяжка: адзін бок зацікаўлены ў прымяншэнні шкоды, другі - у перабольшанні. Іранскі ўдар стаў адказам на раптоўную атаку ізраільцян, якая была ўчынена ў ноч на 13 чэрвеня.

Тэль-Авіў зрабіў масіраваны залп ракетамі "зямля - зямля" і "зямля - паветра". Перад гэтым ізраільскія дыверсійныя групы поўнасцю дэзарганізавалі сістэму СПА і сістэмы армейскага кіравання Ірана. Былі фізічна знішчаны сама меней 20 прадстаўнікоў вышэйшага ваеннага камандавання персаў, у тым ліку начальніка Генштаба і чатыры кіраўнікі Корпуса вартавых іранскай рэвалюцыі. Асабліва інтэнсіўныя бамбардзіроўкі былі праведзены па іранскіх ядзерных аб'ектах. У Натанзе знішчана наземная інфраструктура, зафіксаваны хімічная і радыяцыйная ўцечкі, а ў Ісфахане разбурана частка ядзернага даследчага цэнтра. Сур'ёзна пацярпела гарадская забудова ў Тэгеране, па меншай меры 78 мірных жыхароў загінулі. Толькі позна вечарам у пятніцу Тэгеран здолеў цалкам аднавіць кіраванне арміяй і наладзіць работу сістэм СПА. Тым не менш ізраільскія самалёты працягваюць наносіць удары па наваколлях іранскай сталіцы.

Тэгеран паведамляе, што яму ўдалося збіць два ізраільскія знішчальнікі F-35 і захапіць у палон лётчыцу. У пятніцу, 13 чэрвеня, Іран дабіўся правядзення пасяджэння Савета Бяспекі ААН.

"Кітай асуджае дзеянні Ізраіля, што парушаюць суверэнітэт, бяспеку і тэрытарыяльную цэласнасць Ірана, а таксама выступае супраць абвастрэння напружанасці і эскалацыі канфлікту. Кітай глыбока занепакоены магчымымі сур'ёзнымі наступствамі ізраільскай аперацыі. Мы заклікаем Ізраіль неадкладна спыніць свае ваенныя авантуры і выконваць Статут ААН, а таксама міжнароднае права. Вырашаць спрэчкі трэба палітычнымі і дыпламатычнымі сродкамі", - заявіў пастаянны прадстаўнік КНР пры ААН Фу Цун.

Аднак дзеянні Тэль-Авіва поўнасцю адобрылі і падтрымалі не толькі ЗША, але таксама Францыя, Германія і Вялікабрытанія. Пры гэтым Тэгеран заяўляе, што перамовы са Злучанымі Штатамі наконт іранскай ядзернай праграмы яшчэ не адменены канчаткова. І тым не менш пакуль на Блізкім Усходзе няма ніякіх абнадзейлівых прыкмет зніжэння напружанасці: стала вядома, што Іран збіраецца выпусціць па Ізраілі і базах ЗША на Блізкім Усходзе яшчэ каля 2 тысяч ракет.

У суботу, 14 чэрвеня, бакі працягваюць абменьвацца ўсё больш інтэнсіўнымі ўдарамі і рыхтуюцца да далейшай эскалацыі канфлікту.