У Маскву прыбыў спецпасланнік прэзідэнта ЗША

Сваю пазіцыю па ўкраінскім канфлікце Крэмль абдумае і сфармулюе пасля двухбаковых кантактаў са Злучанымі Штатамі Амерыкі, заявіў прэс-сакратар прэзідэнта Расіі. Паводле слоў Дзмітрыя Пяскова, працэс перадачы ад ЗША інфармацыі па выніках перамоў з Украінай у Джыдзе "ў дзеянні".

13 сакавіка ў Маскву прыбыў спецпасланнік Дональда Трампа Сціў Уіткаф, у тым ліку, як перадае Bloomberg, для сустрэчы з Уладзімірам Пуціным.

Аднак не Уіткаф стане пасрэднікам паміж Вашынгтонам і Масквой ва ўрэгуляванні канфлікту ва Украіне. Пра гэта паведаміў памочнік прэзідэнта Расіі па знешняй палітыцы. Раней Юрый Ушакоў правёў тэлефонную размову з саветнікам па нацбяспецы Трампа Майкам Уолтцам. Спыненне агню, што прапануецца, не больш як часовая перадышка для ўкраінскіх сіл, заявіў Ушакоў.