XI фестываль "Далонька" аб'яднаў у Мінску людзей рознага ўзросту

Дабрачынны праект у падтрымку сям'і, мацярынства і дзяцінства. XI фестываль "Далонька" аб'яднаў у Мінску людзей рознага ўзросту, неабыякавых да захавання традыцыйных каштоўнасцей. Галоўнымі ўдзельнікамі форуму сталі сем'і, якія падзяліліся сваімі гісторыямі ў творчых работах.

Спачатку была "Далонька". Фестываль распачаўся з майстар-класаў, на якіх кожны мог пакінуць адбітак сваёй рукі на памяць і ў знак лучнасці са святам. У выніку назапасілі сотні рознакаляровых далонек маленькіх і вялікіх, мужчынскіх і жаночых, дзіцячых. Тут жа інтэрактывы і квізы пад слоганам "Шчасце - у сям'і" і гульня ў "дочкі-маці" ад дырэктара фестывалю. "Праз лялькі", але ўсур'ёз аб сэнсе і галоўнай задачы дабрачыннага праекта - захаваць жыццё дзіцяці ад моманту яго зачацця.

Святлана Панкратава, сама шматдзетная маці, кажа асабліва пераканаўча.

У Беларусі працуюць некалькі ініцыятыў за жыццё і супраць абортаў: "Матуля", "Пакроў". Асаблівасць "Далонькі" ў тым, што гэта фестываль сацыяльнай рэкламы. У яго аснове - конкурс творчых работ (малюнкі, фота, відэа, кароткі метр). Усё на агульную тэму сям'і, дзяцей, кахання, хатняга ачагу.

170 работ сталі ўдзельнікамі сёлетняга фестывалю. Усе аўтары - аматары. З лета дасылалі на конкурс свае творы. Геаграфія - Навагрудак і Полацк, Жлобін і Мінск, гарады, вёскі - уся Беларусь. Для журы шмат працы і хваляванняў, бо кожны ўдзельнік праекта ўклаў ва ўласны аповед пра сям'ю самае патаемнае, кавалачак душы і сэрца.

Быў на сёлетняй "Далоньцы" і прыз глядацкіх сімпатый. Не толькі за чуллівы твор, але за рэальны прыклад дабрыні і чалавечнасці. Студэнтка педагагічнага ўніверсітэта, валанцёр "Добрага сэрца" Маша Белашэйкіна ўразіла ўсіх. Яна завяршае працэдуру афармлення апекі і забірае з дзіцячага дома 11-гадовую Аксану. Становіцца маці пакуль не фізічна, пра сваю дачушку Маша кажа так: "народжаная сэрцам".

Такія гісторыі сапраўдны цуд, які здарыўся і ў тым ліку і дзякуючы "Далоньцы". Бо фестываль прасякнуты любоўю і аб'ядноўвае добрыя сэрцы.