Беларускі фонд міру перадаў Мінскаму абласному радзільнаму дому апарат штучнай вентыляцыі лёгкіх

17 снежня прадстаўнікі Беларускага фонду міру наведалі калектывы буйных устаноў аховы здароўя краіны. Завіталі ў Мінскі абласны радзільны дом, для якога набылі высокатэхналагічнае медыцынскае абсталяванне - апарат штучнай вентыляцыі лёгкіх.

Такія пераднавагоднія сустрэчы прымеркавалі адразу да дзвюх маштабных акцый - "Нашы дзеці" і "Дай пяць дабру!"

Другі дзень марафон "Нашы дзеці" крочыць з дабрачыннай місіяй па гарадах нашай краіны. З падарункамі, такімі важнымі для здароўя і медыцынскай падтрымкі самых маленькіх беларусаў - у Мінскі абласны радзільны дом завіталі клапатлівыя дарослыя.

Праект "Дай пяць дабру!" сёмы раз аб'ядноўвае шчырыя сэрцы вакол пераднавагодняй дабрачыннасці. Свой клопат, увагу і ўклад ва ўмацаванне матэрыяльна-тэхнічнай інфраструктуры буйных устаноў аховы здароўя краіны разам з калектывам Беларускага фонду міру ўнёс кожны неабыякавы беларус.

Так, сёння ў восем дамоў дзіцяці і чатыры клінічныя бальніцы адправілася высокатэхналагічнае абсталяванне. У прыватнасці апараты штучнай вентыляцыі лёгкіх і медыцынскія прыборы наркозу з пашыранымі функцыямі. Асаблівыя словы падзякі - у гонар прафесіяналаў.

Ганаровымі ўзнагародамі за асабісты ўклад ва ўмацаванне міру - граматамі і нагруднымі медалямі "Заслужаны міратворац" - адзначылі калектыў Мінскага абласнога радзільнага дома.

Да віншаванняў далучылася Герой Беларусі - першая беларуская жанчына-касманаўт Марына Васілеўская.

Марафон добрых спраў не залежыць ад узросту, прафесіі ці населенага пункта. Дабрачынны праект сагрэе душэўнай цеплынёй і атуліць клопатам усе установы, дзе выхоўваюць "Нашых дзяцей".