Першы камбайнер-тысячнік вызначыўся ў Магілёўскай вобласці

356 тыс. га збожжавага кліну трэба будзе прыбраць падчас уборачнай кампаніі ў Магілёўскай вобласці. Адначасова намалот будуць забяспечваць звыш 1 тыс. камбайнаў. Больш за сотню паступяць у рэгіён дадаткова да пачатку масавых работ.

Жніво пераходзіць у актыўную стадыю, таму дысцыпліна і якасць знаходзяцца на асаблівым кантролі, у тым ліку Прэзідэнта Беларусі Аляксандра Лукашэнкі. Аграрыі ловяць кожную пагодлівую гадзіну. Дарэчы, ужо вызначыўся і першы тысячнік у вобласці. Ім стаў механізатар Сяргей Алянкоў з агракамбіната "Зара" Магілёўскага раёна.

Сяргей Алянкоў:

"Калі браць уборачную і ўвесь той час, што я працаваў на камбайне памочнікам, то ў 2025 годзе ўжо гэта мая 25-я ўборачная. На дадзены момант з надвор'ем шмат змагаемся, таму што ідуць дажджы, па дзве-тры гадзіны часам прыбіраем. У 2025-м будзе цяжкая бітва за ўраджай, але мы імкнёмся, бо краіну карміць трэба".

Гендырэктар агракамбіната "Зара" Кацярына Зароўская падкрэсліла, што настроены ўсе выключна на высокі вынік. У полі працуюць шэсць камбайнаў, у тым ліку тры камбайны, якія былі перададзеныя па даручэнні Прэзідэнта. "Збожжасушыльная гаспадарка працуе круглыя суткі, на зернеток паступае штодня каля 400 т збожжа. Надвор'е нас падводзіць, але не палохае", - паведаміла яна.

Усяго ў "Зары" ў гэтым сезоне трэба будзе апрацаваць звыш 5 тыс. га збожжавага кліну. На дадзены момант ужо заканчваюць прыбіраць азімы ячмень.