У Мінску селекцыянеры з 5 краін падзеляцца вопытам вырошчвання яблыкаў, груш і вінаграду

Імпартазамяшчэнне ў кантэксце харчовай бяспекі. У Мінску праходзіць міжнародная канферэнцыя "Сто гадоў навуковаму пладаводству ў Беларусі", якая сабрала спецыялістаў з пяці краін. Так, напрыклад, вучоныя з Расіі і Казахстана прывезлі ўзоры перспектыўных сартоў розных культур. Адна з задач - крыякансервацыя і захаванне генетычнага матэрыялу.

Беларускія вучоныя-аграрыі ствараюць новыя сарты яблыкаў, якія могуць захоўвацца да ўраджаю наступнага года. Акрамя таго, запатрабаваныя такія цеплалюбівыя культуры беларускай селекцыі, як абрыкос і чарэшня. Усяго за стагоддзе айчыннымі навукоўцамі створана больш за 250 сартоў пладовых і ягадных культур.

Калекцыі пладовых, ягадных, арэхаплодных культур і вінаграду Інстытута пладаводства, які знаходзіцца ў пасёлку Самахвалавічы Мінскага раёна, адны з найбуйнейшых ва Усходняй Еўропе. Гэта 42 культуры і больш за 5,5 тыс. сартоў і перспектыўных гібрыдаў.