30 студзеня спаўняецца 105 гадоў са дня нараджэння Івана Шамякіна

30 студзеня спаўняецца 105 гадоў са дня нараджэння народнага пісьменніка, лаўрэата Дзяржпрэміі СССР, дзвюх дзяржпрэмій БССР і прэміі Саюзнай дзяржавы Івана Шамякіна.

Любоў да літаратуры ў аўтара з'явілася яшчэ ў юныя гады. Першыя вершы пачаў пісаць падчас вучобы ў тэхнікуме. З-пад пяра аўтара выйшла вялікая колькасць раманаў, п'ес, аповесцяў, аповядаў, а таксама дзённікавых запісаў, артыкулаў і нарысаў, больш як 100 кніг і больш за 30 перакладаў для замежнага чытача.

На долю пісьменніка выпалі гады, апаленыя вайной. У часы ліхалецця Іван Шамякін узмужнеў на полі бою і вырас як паэт. Ён адным з першых у савецкай літаратуры пачаў распрацоўваць тэму Вялікай Айчыннай вайны. Пяру Шамякіна належыць пенталогія "Трывожнае шчасце" - самы маштабны ў беларускай літаратуры твор пра вайну.

Прымерыў Іван Шамякін і дэпутацкі партфель. У біяграфіі пісьменніка вялікая частка адведзена грамадска-палітычнай дзейнасці. Больш як 10 гадоў ён узначальваў Вярхоўны Савет БССР, некалькі разоў абіраўся дэпутатам Вярхоўнага Савета СССР і БССР, быў членам Цэнтральнага камітэта Кампартыі Беларусі, старшынёй Беларускага камітэта абароны свету. У 1963 годзе пісьменнік нават наведаў ЗША ў складзе беларускай дэлегацыі.

Сёння імя Івана Шамякіна носіць Мазырскі дзяржаўны педуніверсітэт, у яго гонар названа адна са сталічных вуліц у мікрараёне Сухарава-4.

Да 105-гадовага юбілея Беларускі дзяржаўны архіў-музей літаратуры і мастацтва падрыхтаваў віртуальную выставу "Непрыдуманы Шамякін. Дакументальная спадчына класіка". Асабістае з жыцця пісьменніка разархіваваў і Добрушскі краязнаўчы музей, дзе ўзнавілі рабочы кабінет класіка.