Выстава беларускай мастачкі Надзеі Барай адкрылася ў Нацыянальнай бібліятэцы Беларусі

У Мінску адкрылася персанальная выстава беларускай мастачкі Надзеі Барай. Экспазіцыя сабрала каля 70 работ. Палітра тэхнік стракаціць разнастайнасцю - станковая графіка, жывапіс алеем, ілюстрацыі.

Усе работы прысвечаныя малой радзіме мастачкі. Палотны перадаюць цёплыя ўспаміны аб роднай хатцы ў вёсцы Хадынічы Кобрынскага раёна, дзе яна нарадзілася. Персанальная выстава арганізавана да 65-годдзя аўтара.

Надзея Барай праілюстравала дзясяткі беларускіх выданняў, якія папоўнілі фонд Нацыянальнай бібліятэкі Беларусі і прынеслі выдаўцам і аўтарам шматлікія ўзнагароды ў рэспубліканскіх і міжнародных конкурсах. За плячамі майстра 40 гадоў працы ў вядучых выдавецтвах: "Белорусская Энциклопедия имени П. Бровки", "Беларусь", "Мастацкая літаратура".

Прачуць цеплыню беларускіх вёсак можна ў Нацыянальнай бібліятэцы ў галерэі "Лабірынт" да 5 кастрычніка.