У сумеснай малітве вернікі вітаюць немаўля Ісуса ў касцёле Прасвятой Дзевы Марыі ў Мінску

Светлае свята Раства Хрыстовага адзначаюць католікі і пратэстанты. Прэзідэнт Беларусі павіншаваў хрысціян, адзначыўшы, што ў такія дні па-асабліваму ўспрымаецца значнасць міру і згоды, шчырасці і паразумення.

Каб раздзяліць урачыстасць, людзі прыходзяць у храмы і ў сумеснай малітве вітаюць нованароджанага Хрыста.

Цэнтр Мінска. Архікафедральны касцёл Прасвятой Дзевы Марыі. Гэты каталіцкі храм, калі можна так сказаць, рэкардсмен па наведвальніках. Напярэдадні вігілійнае набажэнства сабрала велізарную колькасць людзей, і сёння на працягу дня праходзяць службы, ідуць вернікі, каб памаліцца ў касцёле разам, каб павітаць нованароджанага Ісуса ў стаенцы (гэтае месца асабліва вабіць дзятву). Ісусу пакідаюць цукеркі, мандарыны, печыва. Людзі радуюцца, што Ён прыйшоў на свет. Эмоцыі і перажыванні ў святочны дзень самыя шчырыя.

Божае Нараджэнне, а па-народнаму Каляды - гэта свята не аднаго дня. Касцёл уваходзіць у актаву - асабліва светлы святочны перыяд, які будзе доўжыцца па 1 студзеня. А з 6 па 7 студзеня да католікаў і пратэстантаў далучацца праваслаўныя браты і сёстры - свята Нараджэння Хрыстовага адзначым ужо па юліянскім календары.

25 снежня з пасланнем і благаславеннем "Гораду і свету" да вернікаў звернецца Папа Рымскі Францыск. Трансляцыю з Ватыкана ў 15:35 пакажа тэлеканал "Беларусь 3".