"Другасныя рэсурсы - гэта наша золата". Лукашэнка актуалізаваў задачы па абыходжанні з адходамі

Аднаўляльныя і другасныя рэсурсы для Беларусі - гэта золата, якое літаральна ляжыць пад нагамі, але гэтай сферай у краіне пакуль вельмі слаба займаюцца. Гэта Прэзідэнт Беларусі Аляксандр Лукашэнка заявіў на нарадзе па пытаннях абыходжання з адходамі і выкарыстання другасных матэрыяльных рэсурсаў, паведамляе БЕЛТА.

"Напэўна, для кожнага складу ўрада гэтая тэма з'яўляецца лакмусавай паперкай работы. У нас няма нафты і газу - першасных выкапняў, як вы іх называеце. Але аднаўляльныя і другасныя рэсурсы - гэта наша золата літаральна пад нагамі, якім мы вельмі слаба займаемся, - сказаў кіраўнік дзяржавы. - Гэта фраза, якую я вымавіў, датычыцца не толькі Беларусі. Я часта прыводжу прыклад Швейцарыі. Амаль усё перапрацоўваюць. А мы збіраемся і адзін аднаго ўгаворваем".

Кіраўнік дзяржавы падкрэсліў, што гэта рэзерв для росту эканомікі. Аляксандр Лукашэнка нагадаў, што 11 гадоў таму гэта тэма ўжо абмяркоўвалася ў такім жа складзе, і з таго часу было прынята шмат праграм і мерапрыемстваў, укладзены бюджэтныя рэсурсы.

"Далёка мы рушылі наперад у гэтым плане, ці ёсць вынік ад нашага "рыўка"? Радавы беларус адчуў якія-небудзь змяненні, хаця б у сваіх паводзінах пры сартаванні бытавых адходаў або выкарыстанні папяровай упакоўкі?" - паставіў пытанне Прэзідэнт.

Ён заявіў аб неабходнасці комплексна прааналізаваць работу ўрада і выканкамаў у гэтай сферы.