"Мы заклікаем да міру". Выступленне Лукашэнкі на парадзе ў гонар 80-годдзя Перамогі ў Мінску

Таварышы салдаты, сяржанты, прапаршчыкі і афіцэры!

Дарагія ветэраны Вялікай Айчыннай вайны!

Паважаныя суайчыннікі і госці Беларусі!

Гэта Перамога, сённяшняя Перамога, якую святкуюць Рэспубліка Беларусь, братэрская Расія, нашы сябры і саюзнікі, усе людзі добрай волі, вялікая і заслужаная. Гэта дзень Вялікай Перамогі.

Гэта перамога доблесных воінаў - байцоў Чырвонай Арміі, партызан, падпольшчыкаў і працаўнікоў тылу. Гэта перамога савецкага народа - народа - вызваліцеля ад нацызму.

9 мая 1945 года неба асвятлілі першыя святочныя салюты. Пачалося мірнае жыццё, у якім мы нястомна вядзём лік гадам і дням падзей Вялікай Айчыннай вайны. Вось ужо 80 гадоў святкуем перамогу, успамінаючы герояў і схіляючы галовы перад загінулымі.

Мы праводзім парад на славу тых, хто выстаяў і мужна змагаўся, запавольваючы ход машыны смерці, што раўнавала з зямлёй гарады, вёскі, лёсы і жыцці.

Мы ўшаноўваем памяць герояў, якія зламалі ваенную моц гітлераўскай Германіі, што паставіла пад свае сцягі мільёны еўрапейскіх нацыстаў.

Наш народ паказаў небывалую волю да перамогі. Ніхто ў Еўропе не змог процістаяць вермахту так, як зрабіў гэта наш народ, наша дзяржава - Савецкі Саюз.

На савецкай граніцы тэхнічна падрыхтаваная і ўжо тактычна выпрабаваная армія фашыстаў спатыкнулася. На подступах да Масквы ўвязла на доўгія гады.

У першыя дні толькі ў Беларусі гітлераўцы страцілі больш салдат і афіцэраў, чым за два гады маршу па ўсёй Еўропе.

У радах Чырвонай Арміі ваявала 1,3 млн ураджэнцаў Беларусі. Амаль паўтысячы сталі Героямі Савецкага Саюза.

У тыле ворага змагалася каля мільёна партызан. На тэрыторыі нашай Беларусі дзейнічала звыш 800 тыс. народных мсціўцаў.

16 партызанскіх брыгад на працягу месяца паспяхова процістаялі знятым з фронту, перасягаючым па сіле войскам вермахта і СС, якім дапамагалі здраднікі - латышскія легіянеры, украінскія паліцаі, расійскія "ўласаўцы" і батальёны беларускіх калабарацыяністаў.

За гады акупацыі на нашай зямлі разгарнулася шырокае народнае супраціўленне. Такога масавага, шматнацыянальнага руху партызан і падпольшчыкаў не ведала ні адна краіна ў свеце.

У адзіным страі з намі змагаліся браты - прадстаўнікі больш як сямідзесяці нацый і народнасцей.

Гэта быў сапраўдны другі фронт, барацьба на якім шмат у чым прадвызначыла і прадвырашыла лёс буйнейшых бітваў Вялікай Айчыннай вайны.

Нашы героі выстаялі. Выстаялі і перамаглі. Яны далі Еўропе ўрок, які, як нам здавалася, будзе засвоены. Але на самай справе заходнія эліты неабучальныя.

Еўрасаюз, які ствараўся як палітычнае і эканамічнае аб'яднанне, фактычна трансфармаваўся ў таталітарны ваенна-палітычны блок адкрыта рэваншысцкіх настрояў.

Брусель планамерна ператварае тэрыторыі Польшчы і Прыбалтыйскіх краін у зыходныя раёны для атакі на ўсходніх рубяжах Паўночнаатлантычнага блока.

У год 80-годдзя Вялікай Перамогі Еўрасаюз мае намер падняць аб'ёмы ваенных асігнаванняў да ўзроўню большага за тры працэнты валавога ўнутранага прадукту дзяржаў Еўрасаюза.

Варшава і Вільнюс маюць намер паставіць на граніцы з Беларуссю і Расіяй мінна-ўзрыўныя загароды.

Таму сёння, перад тварам страшэннай пагрозы еўрапейскага фашызму, які адраджаецца, мы заклікаем успомніць урокі Вялікай Айчыннай вайны.

Вось для чаго нам патрэбна сёння гэта Перамога і ўшаноўванне тых герояў.

Мы заклікаем усіх (Апладысменты.): і палітыкаў, і лідараў, і народы заходніх краін.

Не трэба скажона разумець мірную рыторыку Беларусі. Так, мы заклікаем да міру. Так, мы ўсім сэрцам хочам спыніць усе войны і канфлікты на планеце.

Але мы рабілі і будзем рабіць усё неабходнае і нават больш для ўмацавання абароннага патэнцыялу краіны, падтрымання баяздольнасці Узброеных Сіл на ўзроўні, што надзейна забяспечвае абарону суверэнітэту і тэрытарыяльнай цэласнасці беларускай дзяржавы.

Мы больш пад бізуном і ў лапцях хадзіць не хочам і не будзем!

(Апладысменты.)

Беларуская армія - галоўная апора, наш надзейны шчыт. Сёння мы пакажам і мадэрнізаваныя ўзоры ўзбраенняў і ваеннай тэхнікі, створаныя беларускім абаронна-прамысловым комплексам, а таксама пры цесным супрацоўніцтве з Расіяй.

Парадам пройдуць доблесныя ваеннаслужачыя - салдаты, афіцэры і генералы Узброеных Сіл Рэспублікі Беларусь, ваеннаслужачыя Азербайджана, Казахстана, Кыргызстана, Кітайскай Народнай Рэспублікі, Расійскай Федэрацыі, Таджыкістана і Узбекістана.

Мы былі разам тады. Мы разам сёння. І павінны зрабіць усё, каб не дапусціць новай сусветнай бойні, якая можа быць канцом гісторыі.

Дарагія ветэраны Вялікай Айчыннай вайны!

Гэты парад - на славу нашага і вашага подзвігу. Подзвігу воінаў - вызваліцеляў Беларусі, якія сёння жывуць у розных кутках планеты.

Вашы заваёвы і Вялікая Перамога - каштоўнасці, якія мы завяшчаем берагчы сваім дзецям і ўнукам, як гэта робіце вы.

Нізкі паклон вам!

Вечная памяць загінулым героям!

Дарагія сябры, паважаныя госці!

Ад імя беларускага народа ад усёй душы віншую ўсіх з 80-годдзем Вялікай Перамогі.

Жадаю моцнага здароўя, шчасця, дабра і працвітання.

Няхай неба над нашай міралюбнай, любімай, прыгожай, роднай Беларуссю заўсёды будзе мірным!

Са святам!

З Днём Перамогі!

Ура!