Лукашэнка: Беларусь зробіць усё для ўмацавання сяброўства з Кітаем

Беларусь зробіць усё для ўмацавання сяброўства з Кітаем. Мы гатовы развіваць супрацоўніцтва, рэалізуючы сумесныя праекты. Пра гэта заявіў Аляксандр Лукашэнка на сустрэчы з намеснікам старшыні Пастаяннага камітэта Усекітайскага сходу народных прадстаўнікоў Чжан Цінвэем.

Парламентарыі КНР прыбылі ў Беларусь у чацвер, 12 чэрвеня. У кантэксце ўмацавання ўсепагоднага і ўсебаковага стратэгічнага партнёрства цяперашні візіт - важны крок для далейшай актывізацыі міжпарламенцкага дыялогу паміж Беларуссю і Кітаем. Ён накіраваны на рэалізацыю дамоўленасцяў на вышэйшым узроўні.

"Вы добра ведаеце, што нашы з вамі дыпламатычныя, палітычныя адносіны, добрае сяброўства паміж нашымі народамі падмацаваныя сур'ёзнай эканамічнай базай", - сказаў беларускі лідар.

Ён адзначыў, што на тэрыторыі Беларусі з Кітаем пры сумесным фінансаванні рэалізуецца шмат праектаў. "Мы гатовы і надалей у гэтым дачыненні развіваць наша супрацоўніцтва", - запэўніў Аляксандр Лукашэнка.

Па яго словах, у сучасным свеце ў супрацоўніцтве вялікую ролю адыгрывае народная дыпламатыя, асновай якой з'яўляецца супрацоўніцтва паміж дэпутатамі парламентаў. "Такую ролю нашы парламентарыі адыгрываюць яшчэ і таму, што яны знаходзяцца на пярэднім краі. Яны непасрэдна сутыкаюцца з праблемамі народаў. А мы з вамі народныя дзяржавы будуем. Таму нам вельмі важна ведаць настроі людзей і дзейнічаць у іх інтарэсах", - падкрэсліў кіраўнік дзяржавы.

"На сустрэчы са Старшынёй Сі Цзіньпінам мы дамовіліся, што зробім усё для таго, каб ніякія штормы і завірухі не маглі парушыць наша адзінства. Каб мы і далей, як усе гэтыя 30 гадоў, развівалі нашы адносіны і паглыблялі. Вы павінны ведаць, што мы гатовы зрабіць усё для Кітайскай Народнай Рэспублікі, што ў яе інтарэсах на тэрыторыі Беларусі, якая знаходзіцца ў цэнтры Еўропы", - сказаў кіраўнік дзяржавы.

"Мы зробім усё для ўмацавання сяброўства паміж беларускім і кітайскім народамі", - падкрэсліў беларускі лідар.

Візіт кітайскіх парламентарыяў праходзіць практычна адразу пасля візіту ў Пекін Прэзідэнта Беларусі. Аляксандр Лукашэнка і Старшыня КНР Сі Цзіньпін на сустрэчы, якая адбылася ў пачатку месяца і прайшла ў цёплым сямейным фармаце, пацвердзілі ўзаемную накіраванасць на ўмацаванне стратэгічнага партнёрства - стварэнне ўнікальнай мадэлі супрацоўніцтва. Прынята рашэнне прысвяціць наступныя два гады пытанням прамысловай кааперацыі.

13 чэрвеня на сустрэчы ў Палацы Незалежнасці высокі госць перадаў шчырае прывітанне ад Старшыні КНР і выказаў падзяку кіраўніку беларускай дзяржавы за магчымасць сустрэчы, нягледзячы на напружаны графік Прэзідэнта.

"Спадар Прэзідэнт, Вы ў Кітаі вельмі вядомыя. Кітайцы добра ведаюць пра Вас. Мы шчыра ганарымся, што ў кітайскага народа ёсць такі даўні і добры сябар. Кітайскі бок выказвае гатоўнасць сумесна з беларускім бокам разглядаць дамоўленасці на вышэйшым узроўні як асноўнае кіраўніцтва для прымнажэння традыцыйнага сяброўства і паглыблення ўзаемавыгаднага супрацоўніцтва, а таксама для ўшчыльнення ўзаемадзеяння на міжнароднай арэне з мэтай мадэрнізацыі нашых краін і адраджэння нашых нацый", - cказаў намеснік старшыні Пастаяннага камітэта 14-га Усекітайскага сходу народных прадстаўнікоў Чжан Цінвэй.

Госць з Паднябеснай запэўніў Прэзідэнта ў тым, што Кітай гатовы сумесна з Беларуссю цвёрда стаяць на варце вынікаў Другой сусветнай вайны і міжнароднай справядлівасці і сумеснымі намаганнямі фарміраваць супольнасць адзінага лёсу чалавецтва.