Лукашэнка: Гандлёвая галіна Беларусі зберагла самае важнае - арыентаванасць на чалавека

Прэзідэнт Беларусі Аляксандр Лукашэнка павіншаваў работнікаў і ветэранаў гандлёвай галіны з прафесійным святам. Аб гэтым паведамляе БЕЛТА са спасылкай на прэс-службу беларускага лідара.

"Ва ўсе часы гандаль з'яўляўся не проста сферай паслуг са сваімі эканамічнымі законамі, складанай лагістыкай і ўзаемавыгадным тавараабменам. Гэта быў працэс жывога ўзаемадзеяння, усталявання моцных сувязей паміж людзьмі, гарадамі, краінамі і нават кантынентамі", - гаворыцца ў віншаванні.

Прэзідэнт падкрэсліў, што сёння гандлёвая галіна Беларусі - гэта сучасная шматпрофільная індустрыя з гандлёвымі сеткамі, магазінамі крокавай даступнасці, анлайн-гандлем з вялікім асартыментам. Тым не менш яна зберагла самае важнае - арыентаванасць на чалавека і задавальненне яго патрэбнасцей.

"Захавайце традыцыі, закладзеныя ветэранамі, пастаянна павышайце якасць і культуру абслугоўвання, прымнажаючы дасягненні беларускай гандлёвай сістэмы, - заклікаў кіраўнік дзяржавы. - У гэты святочны дзень жадаю вам добрага здароўя, шчасця і новых поспехаў у рабоце. А лепшай узнагародай за вашу штодзённую працу няхай будуць станоўчыя водгукі ўдзячных пакупнікоў".